काही तास चाललेल्या नाट्यमय घडामोडींनंतर संशयित पोलिसांच्या स्वाधीन
राजापूर:
Rajapur Road Railway Station म्हणजेच मुंबई-गोवा रेल्वे मार्गावरील राजापूर रोड रेल्वे स्थानकाबाहेर पोलिसांचा बंदोबस्त पाहून पळालेला एक प्रवासी जवळच्याच एका घरात घुसला. तेथील कोयता आणि घण हातात घेऊन त्याने घरातील लोकांना धमकावण्यास सुरुवात केली. पोलिसांनी आणि ग्रामस्थांनी वारंवार समजावूनही त्याने दरवाजा उघडला नाही. अखेर काही तासांच्या या थरारानंतर संतापलेल्या गावकऱ्यांनी घराचा मागील दरवाजा फोडून त्या व्यक्तीला ताब्यात घेतले, त्याला चोप दिला आणि पोलिसांच्या स्वाधीन केले. एखाद्या चित्रपटाला शोभेल असा हा थरारक प्रकार बुधवार, १ जुलै रोजी सायंकाळी तालुक्यातील सोल्ये येथील रेल्वे स्थानकानजीक असलेल्या फणसवाडीमध्ये घडला.
घरात वृद्ध महिला एकटीच असताना संशयिताचा प्रवेश
बुधवारी मुंबईहून आलेल्या मांडवी एक्स्प्रेसमधून एक प्रवासी राजापूर रोड रेल्वे स्थानकावर उतरला. स्थानकाबाहेर पडताच त्याला समोर पोलिसांचा बंदोबस्त दिसला. पोलिसांना पाहताच घाबरून तो तेथून पळत सुटला आणि जवळच असलेल्या फणसवाडी येथील प्रकाश श्रृंगारे यांच्या घरात घुसला. त्या वेळी श्रृंगारे यांची वृद्ध आई घरात एकटीच होती, तर इतर कौटुंबिक सदस्य शेतीच्या कामासाठी बाहेर गेले होते. घरात शिरताच त्या अज्ञात व्यक्तीने मुख्य दरवाजा आतून बंद करून घेतला. त्यानंतर घरातील कोयता व घण हातामध्ये घेऊन त्याने धमकावण्यास सुरुवात केली.
गावकरी व पोलिसांचे प्रयत्न निष्फळ
या घटनेची माहिती मिळताच प्रकाश श्रृंगारे यांच्यासह इतर ग्रामस्थांनी घराकडे धाव घेतली आणि त्या व्यक्तीला समजावण्याचा प्रयत्न केला. मात्र, त्याने दरवाजा उघडण्यास साफ नकार दिला. परिस्थिती हाताबाहेर जात असल्याचे पाहून सामाजिक कार्यकर्ते शशिकांत प्रभुदेसाई यांना पाचारण करण्यात आले. त्यांनी रेल्वे स्थानकावरील पोलिसांना सोबत घेऊन घटनास्थळ गाठले. पोलीस आणि प्रभुदेसाई यांनी त्या प्रवाशाला शरण येण्याचे वारंवार आवाहन केले, मात्र तो ऐकण्याच्या मनःस्थितीत नव्हता. दरम्यान, राजापूर पोलीस ठाण्याचे पथकही तेथे दाखल झाले, तरीही संशयित आतून धमक्या देतच राहिला.
ग्रामस्थांनी मागचा दरवाजा फोडला; पोलिसांच्या भूमिकेवर प्रश्नचिन्ह
हा प्रकार संपूर्ण परिसरात पसरल्याने फणसवाडीत लोकांची मोठी गर्दी जमली. अखेर संयम सुटलेल्या काही धाडसी ग्रामस्थांनी घराचा मागील दरवाजा तोडून आत प्रवेश केला आणि त्या व्यक्तीला जागीच पकडले. या वेळी संतप्त जमावाने त्याला चांगलाच चोप दिला. या संपूर्ण प्रकरणात पोलिसांनी वेळेवर आणि ठोस कारवाई केली नसल्याचा थेट आरोप ग्रामस्थांनी केला असून, पोलिसांच्या ढिसाळ भूमिकेबाबत तीव्र नाराजी व्यक्त होत आहे. पकडलेल्या संशयिताला शासकीय वाहनातून न नेता खाजगी रिक्षाने पोलीस ठाण्यात पाठवल्यामुळेही परिसरात उलटसुलट चर्चा सुरू आहे.
संशयित जिल्हा रुग्णालयात दाखल; तपासाचे आव्हान
तो प्रवासी नेमका कोण आहे? पोलिसांना बघून तो का पळाला? तो एखादा अट्टल गुन्हेगार आहे का? यांसारख्या अनेक प्रश्नांची उत्तरे अद्याप गुलदस्त्यात आहेत. जमावाच्या मारहाणीत जखमी झाल्यामुळे त्याला उपचारासाठी रत्नागिरी येथील जिल्हा शासकीय रुग्णालयात दाखल करण्यात आले आहे. पोलिसांकडून अद्याप यावर कोणतीही अधिकृत माहिती देण्यात आलेली नाही. रुग्णालयातून डिस्चार्ज मिळाल्यानंतर त्याचा सविस्तर जबाब नोंदवला जाईल आणि त्यानंतरच या गूढ प्रकरणाचा खरा उलगडा होण्याची शक्यता आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:31 03-07-2026
