मुंबई: दापोली ते पोलादपूरमार्गे महाबळेश्वर या राष्ट्रीय महामार्गाला (National Highway) मंजुरी देण्याबाबत भाजप गटनेते आमदार प्रवीण दरेकर यांनी नवी दिल्ली येथे केंद्रीय रस्ते वाहतूक व महामार्ग मंत्री नितीन गडकरी यांची आज, ७ जुलै रोजी त्यांच्या निवासस्थानी भेट घेतली. या महत्त्वपूर्ण भेटीदरम्यान आमदार दरेकर यांनी केंद्रीय मंत्री गडकरी यांना आपल्या विविध मागण्यांचे सविस्तर निवेदन सुपूर्द केले.
Dapoli Mahabaleshwar National Highway: आंबेनळी घाटातील धोका अन् नव्या महामार्गाची गरज
आमदार प्रवीण दरेकर यांनी केंद्रीय मंत्री नितीन गडकरी यांना दिलेल्या निवेदनात या महामार्गाचे भौगोलिक आणि आर्थिक महत्त्व प्रामुख्याने अधोरेखित केले आहे:
- कोकण-पश्चिम महाराष्ट्र जोडणारा दुवा: दापोली ते पोलादपूरमार्गे महाबळेश्वर हा महामार्ग कोकण आणि पश्चिम महाराष्ट्राला परस्परांशी जोडणारा अत्यंत महत्त्वाचा दुवा ठरणार आहे.
- आंबेनळी घाटातील संकटे: सध्याच्या दापोली-महाबळेश्वर मार्गावर असलेला आंबेनळी घाट हा अतिशय वळणाचा आणि संवेदनशील आहे. या घाटात पावसाळ्यात दरडी कोसळणे आणि रस्ता खचणे यांसारख्या गंभीर समस्यांना सातत्याने तोंड द्यावे लागते.
- पावसाळ्यातील ताप्तुरती बंदी: राज्य शासनाकडून या घाटात रस्ता रुंदीकरण, कडेचे बांधकाम आणि धोकादायक वळणांवर सुरक्षा भिंती बसविण्याची कामे केली जातात. परंतु, महाबळेश्वर आणि पोलादपूर पट्ट्यात होणाऱ्या मुसळधार पावासामुळे दरड कोसळण्याचा धोका निर्माण होऊन अनेकदा हा रस्ता वाहतुकीसाठी पूर्णपणे बंद करावा लागतो.
पर्यटन आणि कृषी क्षेत्राला मिळणार मोठी गती; नितीन गडकरींचा सकारात्मक प्रतिसाद
पश्चिम महाराष्ट्रातील विशेषतः सातारा, सांगली, कोल्हापूर या परिसरातून कोकणात येण्यासाठी आणि कोकणातील लोकांना पश्चिम महाराष्ट्रात जाण्यासाठी अधिक सुरक्षित व वेगवान महामार्गाची नितांत गरज निर्माण झाली आहे. याच पार्श्वभूमीवर दापोली ते पोलादपूरमार्गे महाबळेश्वर या राष्ट्रीय महामार्गाची उभारणी करावी, अशी मागणी दोन्ही विभागांतील जनतेकडून सातत्याने केली जात आहे.
महामार्गाचे होणारे फायदे: १. पर्यटनाला मोठी चालना: महाबळेश्वर हे देशातील सर्वोच्च पर्यटन स्थळ आहे, तर दापोली आणि कोकण किनारपट्टीवर अतिशय स्वच्छ, सुंदर समुद्रकिनारे (Beaches) आणि प्रसिद्ध तीर्थक्षेत्रे आहेत. या नव्या महामार्गामुळे दोन्ही बाजूंच्या पर्यटनाला मोठी गती मिळेल. २. सुरक्षित आणि वेगवान प्रवास: घाटातील वेडीवाकडी वळणे आणि दरडींचा धोका टळल्यामुळे प्रवाशांचा प्रवास अधिक सुरक्षित व वेळेची बचत करणारा होईल. ३. हापूस अन् काजू वाहतुकीला वेग: कोकणातील जगप्रसिद्ध हापूस आंबा, काजू इत्यादी कृषी उत्पादनांची पश्चिम महाराष्ट्रात आणि देशाच्या इतर बाजारांत वाहतूक करण्यासाठी हा मार्ग अत्यंत सोयीचा ठरेल.
या सर्व बाबींचा सकारात्मक विचार करून दापोली ते पोलादपूरमार्गे महाबळेश्वर या राष्ट्रीय महामार्गाला केंद्रीय स्तरावरून तातडीने मंजुरी द्यावी आणि त्यासाठी आवश्यक ती आर्थिक तरतूद करावी, अशी आग्रही विनंती आमदार प्रवीण दरेकर यांनी केली. त्यांच्या या मागणीला केंद्रीय रस्ते वाहतूक मंत्री नितीन गडकरी यांनी अत्यंत सकारात्मक प्रतिसाद दिला आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
17:26 07-07-2026
