वडापाव आणण्यासाठी गेलेल्या बालिकेसोबत चाळिशी ओलांडलेल्या चालकाचे संतापजनक कृत्य
दापोली: Dapoli POCSO Case | दापोली तालुक्यात एक अत्यंत संतापजनक आणि धक्कादायक घटना उघडकीस आली आहे. हॉटेलमध्ये वडापाव आणण्यासाठी गेलेल्या एका ७ वर्षीय चिमुरड्या बालिकेशी कथित गैरवर्तन केल्याप्रकरणी हॉटेल चालकाविरोधात दापोली पोलीस ठाण्यात पोक्सो (POCSO) कायदा तसेच भारतीय न्याय संहितेअंतर्गत (BNS) गुन्हा दाखल करण्यात आला आहे. पोलिसांनी या प्रकरणातील संशयित आरोपीला तातडीने अटक केली असून, न्यायालयाने त्याला पोलीस कोठडी सुनावली आहे.
भावाला बाहेर पाठवून बालिकेला स्वयंपाकघरात नेले
पोलिसांनी दिलेल्या अधिकृत माहितीनुसार, ही घटना मंगळवार, दिनांक ७ जुलै रोजी सायंकाळी ६ वाजण्याच्या सुमारास एका हॉटेलमध्ये घडली. पीडित ७ वर्षीय बालिका तिच्या १२ वर्षीय भावासोबत सदर हॉटेलमध्ये वडापाव खरेदी करण्यासाठी गेली होती. त्यावेळी हॉटेल चालक किशोर भगवान पटेल (वय ५०) याने मुलीच्या भावाला काहीतरी कारण सांगून हॉटेलच्या बाहेर पाठवले. त्यानंतर भावाची गैरहजेरी पाहून आरोपीने बालिकेला हॉटेलच्या स्वयंपाकघरात (किचन) नेले आणि तिच्याशी कथित गैरवर्तन केले.
पीडितेने आईला सांगितली आपबिती; नराधम जेरबंद
हॉटेलमधून घरी परतल्यानंतर घाबरलेल्या बालिकेने तिच्यासोबत घडलेला सर्व धक्कादायक प्रकार आपल्या आईला सांगितला. मुलीचे बोलणे ऐकून पालकांनी तात्काळ दापोली पोलीस ठाणे गाठून फिर्याद दिली. पालकांच्या तक्रारीवरून दापोली पोलिसांनी गांभीर्याने पावले उचलत आरोपी किशोर भगवान पटेल याच्याविरुद्ध पोक्सो कायद्याच्या संबंधित कलमांसह भारतीय न्याय संहितेनुसार गुन्हा नोंदवला आणि त्याला बेड्या ठोकल्या.
सहाय्यक पोलीस निरीक्षक पूजा हिरेमठ यांच्याकडे तपास
या संवेदनशील प्रकरणाची गांभीर्याने दखल घेण्यात आली असून, अटकेत असलेल्या आरोपीला न्यायालयात हजर केले असता न्यायालयाने त्याला पोलीस कोठडीत ठेवण्याचे आदेश दिले आहेत. या प्रकरणाचा पुढील सखोल तपास दापोली पोलीस ठाण्याच्या सहाय्यक पोलीस निरीक्षक (API) पूजा हिरेमठ करत आहेत. या घटनेमुळे दापोली परिसरात बालकांच्या सुरक्षेचा प्रश्न पुन्हा एकदा ऐरणीवर आला असून नागरिकांमधून तीव्र संताप व्यक्त होत आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:30 10-07-2026
