५ दिवसांच्या संततधारेमुळे धरणांमधील साठ्यात मोठी वाढ
रत्नागिरी: जिल्ह्यात गेल्या काही दिवसांपासून पावसाने जोरदार मुसंडी मारली आहे. सतत कोसळणाऱ्या मुसळधार पावसामुळे अखेर संपूर्ण जिल्ह्याची पाणीटंचाई संपुष्टात आली आहे. रत्नागिरी शहराला मुख्य पाणीपुरवठा करणारे शीळ धरण पूर्ण भरून वाहू (ओव्हरफ्लो) लागल्याने शहरवासीयांना मोठा दिलासा मिळाला आहे. शीळ धरणासोबतच पानवल आणि कळझोंडी ही धरणेही तुडुंब भरली आहेत.
जूनअखेर सक्रिय झालेल्या पावसाने फिरवली चक्रे
यंदा वातावरणीय प्रतिकूलतेमुळे जिल्ह्यात मोसमी पावसाचे आगमन बराच उशिराने झाले होते. सुरुवातीला पाऊस अडखळल्यामुळे धरण क्षेत्रातील पाणीसाठा कमालीचा खालावला होता, ज्यामुळे रत्नागिरीकरांवर तीव्र ‘पाणीबाणी’चे संकट ओढवले होते.
अखेर जून महिन्याच्या शेवटच्या आठवड्यात मान्सून जिल्ह्यात पूर्णपणे सक्रिय झाला. गेल्या पाच दिवसांपासून पाणलोट क्षेत्रात सातत्याने झालेल्या मुसळधार पावसामुळे धरणांमधील पाण्याची टक्केवारी झपाट्याने वाढली आणि सिंचनाला मोठे बळ मिळाले आहे.
रत्नागिरीकरांमध्ये समाधानाचे वातावरण
शीळ धरण तुडुंब भरल्यामुळे आता रत्नागिरी शहरवासीयांना मुबलक पाणीपुरवठा होणार आहे. ऐन उन्हाळ्यानंतर उद्भवलेली टंचाई दूर झाल्याने शहरातील नागरिक आणि प्रशासनाने सुटकेचा निःश्वास सोडला असून संपूर्ण परिसरात समाधानाचे वातावरण पाहायला मिळत आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
18:07 21-07-2026
