“चूक झाली तरी पोटात घेण्याची ताकद अन् क्षमा करण्याचा मोठेपणा”; एकनाथ शिंदेंकडून पंतप्रधान मोदींच्या नेतृत्वाचा गौरव
मुंबई:
Eknath Shinde Post सध्या सोशल मीडियावर प्रचंड व्हायरल होत असून, कॉकरोच जनता पार्टीच्या आंदोलनादरम्यान पंतप्रधान नरेंद्र मोदी आणि त्यांच्या स्वर्गीय आईबद्दल वापरलेल्या असभ्य भाषेनंतरही पंतप्रधानांनी दाखवलेल्या क्षमाशीलतेचे उपमुख्यमंत्री एकनाथ शिंदे यांनी भरभरून कौतुक केले आहे. जंतर-मंतरवरील आंदोलनात काही विद्यार्थ्यांनी केलेल्या शिवीगाळप्रकरणी पंतप्रधानांनी त्यांना माफ करत पुढे जाण्याचे आवाहन करणारा एक विशेष व्हिडिओ शेअर केला होता. पंतप्रधानांचा हा व्हिडिओ रिशेअर करत एकनाथ शिंदे यांनी आपल्या सोशल मीडिया अकाउंटवरून पंतप्रधान मोदी यांच्या संवेदनशील आणि पालकत्वाच्या भूमिकेवर भाष्य केले आहे.
आपल्या सोशल मीडिया पोस्टमध्ये एकनाथ शिंदे यांनी लिहिले आहे की, “आई-वडिलांसारखी माया, चूक झाली तरी पोटात घेण्याची ताकद आणि क्षमा करण्याचा मोठेपणा असणारे नेतृत्व क्वचितच पाहायला मिळते.” पंतप्रधान मोदी यांनी देशातील युवा पिढीला दिलेला हा संदेश केवळ एका देशाच्या प्रमुखाचा नसून आपल्या मुलांवर जीवापाड प्रेम करणाऱ्या एका पालकासारखा होता, अशा शब्दांत शिंदेंनी आपल्या भावना व्यक्त केल्या आहेत. मतभेद असणे किंवा चुका होणे स्वाभाविक असले, तरी आपल्याच मुलांना वाऱ्यावर सोडून देणे हा भारतीय संस्कार नाही, असेही त्यांनी अधोरेखित केले.
एकनाथ शिंदे यांनी पुढे नमूद केले की, भरकटलेल्या मुलांना समजावून सांगून, क्षमा करून पुन्हा राष्ट्रनिर्मितीच्या मुख्य प्रवासात सहभागी करून घेणे हीच खऱ्या नेतृत्वाची खरी ओळख आहे. संवाद, सहभाग आणि परस्पर विश्वास या तीन प्रमुख स्तंभांच्या पायावरच सक्षम आणि आत्मनिर्भर भारत उभा राहील, असा विश्वास त्यांनी व्यक्त केला. गेल्या काही दिवसांपासून पंतप्रधान नरेंद्र मोदी स्वतः सेल्फी कॅमेऱ्याने व्हिडिओ शूट करून सोशल मीडियाच्या माध्यमातून थेट देशातील तरुणांशी संवाद साधत असून, त्यांच्या या नव्या कार्यशैलीची आणि भूमिकेची राजकीय वर्तुळात मोठी चर्चा रंगली आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:03 01-08-2026
