कॉकरोच जनता पार्टीची आगामी ध्येय-धोरणे आणि सामाजिक भूमिकेवर स्पष्ट भाष्य
मुंबई:
“मला कोणतीही राजकीय महत्त्वाकांक्षा नाही, तशी महत्त्वाकांक्षा असती तर मी अमेरिकेला गेलोच नसतो. मला केवळ माझ्या मूळ गावचा सरपंच व्हायचे होते,” असे थेट आणि परखड मत ‘कॉकरोच जनता पार्टी’चे प्रमुख अभिजीत दिपके यांनी व्यक्त केले आहे. एका वृत्त वाहिनीच्या कार्यक्रमात ते बोलत होते. यावेळी त्यांनी बालपणीच्या आठवणी, गावाबद्दलची ओढ, देशातील सध्याची राजकीय आणि सामाजिक परिस्थिती तसेच कॉकरोच जनता पार्टीच्या भावी वाटचालीवर अत्यंत मोकळेपणाने भाष्य केले.
“सरपंच होऊन गाव सुधारण्याचे स्वप्न होते”; बालपणीच्या आठवणींना दिला उजाळा
आपल्या लहानपणीच्या आठवणींना उजाळा देताना अभिजीत दिपके म्हणाले, “हिंगोली जिल्ह्यातील ‘संतोष पिंपरी’ हे माझे मूळ गाव आहे. लहानपणापासूनच मला गावाची मोठी ओढ होती. दर उन्हाळ्यात मी गावी दोन-तीन महिने राहायचो. मी स्वतः एका चांगल्या शाळेत शिकत होतो; परंतु माझे मामा आणि काकांची मुले गावात तुटलेल्या शाळेत, फुटलेल्या फरशीवर बसून शिकायची. विजेची सोय नव्हती, मातीची आणि पत्र्याची घरे होती. उन्हाळ्यात ड्रम गाडीवर बांधून पाच रुपये देऊन पाणी भरावे लागायचे आणि त्यावर ३-४ दिवस काढावे लागायचे.”
ते पुढे म्हणाले, “माझ्या वडिलांना चांगले शिक्षण मिळाले, त्यामुळे मलाही उत्तम शिक्षण घेता आले. गावाची ही बिकट अवस्था पाहून मला माझ्या गावासाठी काहीतरी करायचे होते. म्हणूनच मी घरच्यांना नेहमी सांगायचो की मला गावात सरपंच व्हायचे आहे. गावातील शाळा नीट करायची आहे, रस्ते, नाले दुरुस्त करायचे आहेत आणि एक चांगला दवाखाना उभारायचा आहे.”
ईडी, सीबीआय आणि सध्याच्या राजकारणावर खरमरीत टीका
सध्याच्या राजकीय वातावरणावर बोलताना दिपके म्हणाले की, “मी लहानपणी पाहिलेला भारत आणि आजचा भारत यामध्ये खूप मोठा बदल झाला आहे. मी जेव्हा ‘आम आदमी पार्टी’च्या माध्यमातून राजकारणात सक्रिय होतो, तो काळ आणि आजचा काळ पूर्णपणे वेगळा आहे. तेव्हा काही प्रमाणात लोकशाही शिल्लक होती, मात्र आता ती उरलेली नाही. आज जात आणि धर्मावरून भेदभाव केला जात आहे. ईडी (ED) आणि सीबीआय (CBI) सारख्या केंद्रीय यंत्रणांचा वापर केवळ राजकीय पक्ष फोडण्यासाठी केला जात आहे. शिवसेना आणि राष्ट्रवादी काँग्रेस हे पक्ष कशाप्रकारे फोडले गेले, हे सर्वांनी पाहिले आहे.”
CJP Future Plan: कॉकरोच जनता पार्टीची पुढची दिशा काय?
पक्षाच्या आगामी धोरणांवर प्रकाश टाकताना त्यांनी सांगितले की:
- पूर्णवेळ स्वयंसेवक आणि दबाव गट: कॉकरोच जनता पार्टीकडे पूर्णवेळ काम करणारे स्वयंसेवक आहेत. वेगवेगळ्या स्तरांवर सामाजिक प्रश्न सोडवण्यासाठी एक विशेष गट तयार केला जात आहे.
- राजकीय दबाव गट म्हणून काम: आम्ही निवडणूक लढवण्याऐवजी एक ‘राजकीय दबाव गट’ (Political Pressure Group) म्हणून काम करणार आहोत. लोकशाहीत जितके जास्त दबाव गट असतील, तितके ते जनतेच्या हिताचे असते.
- चळवळीचे महत्त्व: एकाच व्यक्तीच्या किंवा राजकीय पक्षाच्या भोवती आशा लावून बसणे लोकशाहीसाठी घातक ठरेल. पुढच्या पाच वर्षांनंतर आमची विचारसरणी कदाचित जुनी (Outdated) वाटू शकते, पण त्यावेळी नवीन तरुण नवी चळवळ उभी करतील आणि हीच लोकशाहीची खरी ताकद आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:49 03-08-2026
