आज पीक कर्ज खात्यात निधी वर्ग होणार
मुंबई:
राज्य सरकारच्या अतिशय महत्त्वाकांक्षी ‘पुण्यश्लोक अहिल्यादेवी होळकर शेतकरी कर्जमुक्ती योजना-२०२६’ संदर्भात एक अत्यंत महत्त्वाची बातमी समोर आली आहे. सहकार विभागाने दिलेल्या माहितीनुसार, या कर्जमुक्ती योजनेअंतर्गत छाननीनंतर पात्र ठरलेल्या राज्यातील १६ लाख ९४ हजार शेतकऱ्यांच्या पीक कर्ज खात्यात ४ ऑगस्ट (मंगळवार) रोजी एकाच वेळी सुमारे ७ हजार कोटी रुपयांचा निधी जमा करण्यात येणार आहे. या निर्णयामुळे राज्यातील हजारो शेतकऱ्यांचा पुन्हा नवीन पीक कर्ज घेण्याचा मार्ग मोकळा होणार आहे.
दरम्यान, पहिल्या टप्प्यात दोन लाखांच्या आतील कर्जदार शेतकऱ्यांची माहिती प्राप्तिकर विभागाकडे छाननीसाठी पाठवण्यात आली होती. यात ९४ हजार शेतकरी आयकरदाता (इन्कम टॅक्स भरणारे) असल्याचे निष्पन्न झाल्याने त्यांना या योजनेतून अपात्र ठरवण्यात आले आहे.
दोन लाखांपर्यंत कर्जमाफी आणि ५० हजारांचा प्रोत्साहन निधी
राज्य सरकारच्या या योजनेच्या धोरणानुसार, ज्या शेतकऱ्यांचे ३० सप्टेंबर २०२५ पर्यंतचे पीक कर्ज थकीत आहे, त्यांना २ लाख रुपयांपर्यंत कर्जमाफी दिली जात आहे.
- नियमित कर्जदारांना प्रोत्साहन: नियमितपणे पीक कर्जाची परतफेड करणाऱ्या प्रामाणिक शेतकऱ्यांना ५० हजार रुपयांचा प्रोत्साहन निधी दिला जाणार आहे.
- एकवेळ समझोता योजना (OTS): २ लाख रुपयांपेक्षा जास्त कर्ज थकबाकी असलेल्या शेतकऱ्यांनी त्यांच्या हिश्शाची २ लाखांवरील अतिरिक्त रक्कम बँकेत भरल्यानंतर, ‘वन टाईम सेटलमेंट’ अंतर्गत सरकार त्यांच्या खात्यात २ लाख रुपये जमा करेल. Schemes In India
- आधार प्रमाणीकरण आवश्यक: या योजनेचा प्रत्यक्ष लाभ मिळवण्यासाठी पात्र शेतकऱ्यांनी आपले आधार प्रमाणीकरण (Aadhaar Authentication) आणि ॲग्रीस्टॅक नोंदणी पूर्ण करणे बंधनकारक करण्यात आले आहे.
भंडारा जिल्हा: २२ हजार ३६५ शेतकऱ्यांना १३७ कोटींपेक्षा जास्त कर्जमाफी
या कर्जमुक्ती अभियानाचा मोठा फायदा विदर्भातील भंडारा जिल्ह्याला झाला आहे. भंडारा जिल्ह्यातील तब्बल २२ हजार ३६५ शेतकरी या कर्जमुक्तीसाठी पात्र ठरले आहेत. या शेतकऱ्यांना एकूणात १३७ कोटी १३ लाख ३३ हजार रुपयांची कर्जमाफी मिळाली आहे.
भंडारा जिल्हाधिकारी सावन कुमार यांनी दिलेल्या माहितीनुसार, जिल्हा बँकेतील २३ हजार ६५५ आणि राष्ट्रीयकृत, खासगी तसेच ग्रामीण बँकांमधील ६ हजार ९३९ अशी एकूण ३० हजार ५९४ कर्जखाती महाआयटी (MahaIT) पोर्टलवर अपलोड करण्यात आली होती. सध्या जिल्ह्यातील पात्र लाभार्थ्यांपैकी तब्बल ७५ टक्के शेतकऱ्यांचे आधार प्रमाणीकरण यशस्वीरीत्या पूर्ण झाले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:12 03-08-2026
