सरन्यायाधीश सूर्यकांत यांच्या विशेष खंडपीठासमोर पार पडणार सुनावणी; ठाकरे विरुद्ध शिंदे गटातील वादावर राज्याचे लक्ष
Shivsena Supreme Court Hearing संदर्भात एक मोठी आणि राजकीयदृष्ट्या अत्यंत महत्त्वाची बातमी समोर येत आहे. शिवसेना पक्षनाव आणि मूळ ‘धनुष्यबाण’ चिन्ह एकनाथ शिंदे यांच्या गटाला देण्याच्या निवडणूक आयोगाच्या निर्णयाविरोधात, तसेच आमदार अपात्रतेसंदर्भात ठाकरे गटाने दाखल केलेल्या आव्हान याचिकेवर आज (४ ऑगस्ट) सर्वोच्च न्यायालयात सुनावणी पार पडणार आहे. ही सुनावणी सरन्यायाधीश सूर्यकांत, न्यायमूर्ती जॉयमला बागची आणि न्यायमूर्ती व्ही. मोहना यांच्या विशेष खंडपीठासमोर होणार आहे.
याआधी ३० जुलै रोजी झालेल्या सुनावणीदरम्यान ठाकरे गटाच्या वतीने ज्येष्ठ वकील कपिल सिब्बल यांनी जोरदार युक्तिवाद केला होता. विधिमंडळातील बहुमत म्हणजे मूळ राजकीय पक्ष नव्हे, असा महत्त्वाचा युक्तिवाद करत सिब्बल यांनी शिंदे गटाला पक्ष आणि चिन्ह बहाल करण्याच्या निर्णयावर तीव्र आक्षेप नोंदवला होता. आमदारांच्या फुटीला मान्यता दिल्याने पक्षांतर बंदी कायद्याचा मुख्य उद्देशच मोडीत निघत असून, लोकशाहीला यामुळे मोठा धोका निर्माण झाला आहे, असे त्यांनी न्यायालयाच्या निदर्शनास आणून दिले होते.
युक्तिवादात सिब्बल यांनी स्पष्ट केले होते की, केवळ ३१ आमदारांनी पारित केलेला ठराव हा संपूर्ण राजकीय पक्षाचा निर्णय असू शकत नाही. निवडणूक आयोगाने राजकीय पक्षाच्या अंतर्गत बहुमताकडे दुर्लक्ष करून केवळ विधिमंडळातील संख्याबळ लक्षात घेतले, जी घटनात्मकदृष्ट्या मोठी चूक आहे. याशिवाय, विधानसभा अध्यक्षांनी बंडखोर आमदारांना अपात्र न ठरवून घटनात्मक हाराकिरी केली असून, जर या याचिकेवर वेळेत निर्णय झाला असता तर शिंदे सरकार अस्तित्वात आलेच नसते, असा दावाही त्यांनी न्यायालयात केला होता.
दरम्यान, नुकत्याच पार पडलेल्या शिवसेना भवनातील बैठकीत बोलताना उद्धव ठाकरे यांनी पक्षचिन्हाबाबत महत्त्वाचे वक्तव्य केले होते. सर्वोच्च न्यायालय धनुष्यबाण हे मूळ चिन्ह आपल्यालाच देईल आणि जर चिन्ह दिले गेले नाही तर ते गोठवले जाईल, असा विश्वास त्यांनी व्यक्त केला होता.
जून २०२२ मध्ये एकनाथ शिंदे यांनी शिवसेनेतील ४० पेक्षा जास्त आमदारांसह केलेले बंड आणि त्यानंतर झालेले सत्तांतर यावरून सुरू असलेला हा न्यायालयीन लढा आता अत्यंत निर्णायक टप्प्यात पोहोचला आहे. गेल्या सुमारे तीन-चार वर्षांपासून प्रलंबित असलेल्या या केसमध्ये आज सर्वोच्च न्यायालय काय भूमिका घेते आणि पुढील सुनावणीची दिशा काय ठरते, याकडे संपूर्ण महाराष्ट्राच्या राजकीय वर्तुळाचे लक्ष लागून राहिले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:56 04-08-2026
