कोकणातील जमिनी, पर्यटन आणि आंबा व्यवसायावर परप्रांतीयांचे वर्चस्व; सोशल मीडियावर नेटिझन्सच्या प्रतिक्रियांचा पाऊस
मुंबई / कोकण ब्यूरो: आपल्या सहजसुंदर अभिनयशैलीसोबतच बेधडक आणि स्पष्टवक्तेपणासाठी ओळखला जाणारा मराठी मनोरंजन विश्वातील लोकप्रिय अभिनेता वैभव मांगले (Vaibhav Mangle) पुन्हा एकदा सोशल मीडियावरील आपल्या वक्तव्यामुळे चर्चेच्या केंद्रस्थानी आला आहे. Vaibhav Mangle Post द्वारे त्याने कोकणातील वेगाने बदलत्या सामाजिक, आर्थिक आणि सांस्कृतिक समीकरणांवर तीव्र चिंता व्यक्त केली आहे. कोकणातील जमिनी, आंबा व्यवसाय, पर्यटन आणि स्थानिक रोजगारावर उत्तर भारतातील लोकांचा वाढता प्रभाव पाहता भविष्यात स्थानिक कोकणी माणसाचे काय होणार, असा प्रश्न त्याने उपस्थित केला आहे.
‘नारळ काढायला केरळी तर कामाला नेपाळी’; काय म्हणाला वैभव मांगले?
अभिनेता वैभव मांगले याने आपल्या अधिकृत इन्स्टाग्राम (Instagram) अकाऊंटवरून एक विशेष संदेश शेअर केला आहे. या पोस्टमध्ये त्याने लिहिले की, “ज्याप्रकारे कोकणात, विशेषतः किनारपट्टी भागात, उत्तरेकडील लोक मोठ्या प्रमाणावर जमिनी विकत घेत आहेत, पर्यटन आणि आंबा व्यवसाय ताब्यात घेत आहेत, ते पाहता भविष्यात चित्र वेगळे असू शकते.”
पुढे बोलताना त्याने स्थानिक रोजगारावर भाष्य करत म्हटले, “घरकाम आणि इतर कामांसाठी भैय्या किंवा नेपाळी लोकांना ठेवले जात आहे, तर नारळ काढण्यासाठी केरळातून लोक येत आहेत. हे चित्र पाहता लवकरच कोकणवासीयांना हिंदी, नेपाळी, गुजराती आणि मल्याळम या भाषा शिकाव्या लागतील असे दिसत आहे.”
‘या परिस्थितीला स्थानिकच जबाबदार’; नेटकऱ्यांमध्ये रंगली जोरदार चर्चा
वैभव मांगलेच्या या संवेदनशील पोस्टनंतर सोशल मीडियावर कोकणवासीयांसह चाहत्यांच्या प्रतिक्रियांचा पूर आला आहे. अनेक नेटिझन्सनी त्याच्या मताशी सहमती दर्शवली असली, तरी काही जणांनी या परिस्थितीसाठी स्थानिक मनोवृत्तीलाच जबाबदार धरले आहे.
एका चाहत्याने प्रतिक्रिया देताना लिहिले, “या परिस्थितीला काही प्रमाणात आळशी बनलेला स्थानिक कोकणी माणूसच जबाबदार आहे. चाकरमानी जेव्हा कोकणात जातात आणि स्थानिक ग्रामस्थांना लहान-सहान कामे देतात, तेव्हा ती कामे करायला टाळाटाळ केली जाते. त्यामुळे शेवटी नाईलाजाने परप्रांतीयांना काम द्यावे लागते.” तर दुसरीकडे अनेक युझर्सनी संपूर्ण कोकणात हेच चित्र सुरू असून स्थानिक तरुण रोजगाराच्या शोधात शहरांकडे स्थलांतरित होत असल्यामुळे ही वेळ आल्याची खंत व्यक्त केली आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
15:47 05-08-2026
