कोंड्ये तर्फे सौंदळ येथे बैलाने भातशेतीचे नुकसान झाल्याच्या रागातून घटना; राजापूर पोलिसांत गुन्हा नोंद
रत्नागिरी जिल्ह्यातील राजापूर तालुक्यातील कोंड्ये तर्फे सौंदळ येथे भातशेतीच्या नुकसानीच्या कारणावरून झालेल्या वादाचे पर्यवसान मारहाणीपर्यंत झाले आहे. Rajapur Assault प्रकरणात २९ जुलै २०२६ रोजी सायंकाळी घडलेल्या घटनेप्रकरणी ५ ऑगस्ट रोजी राजापूर पोलीस ठाण्यात गुन्हा दाखल करण्यात आला आहे. फिर्यादी किशोर गणपत शिवगण (वय ५५) यांनी दिलेल्या तक्रारीनुसार, आरोपीने त्यांना मारहाण करत जीवे मारण्याची धमकी दिली.
भातशेतीच्या नुकसानीवरून वाद
पोलीस माहितीनुसार, फिर्यादी किशोर शिवगण आणि त्यांची पत्नी करिश्मा हे कामावरून घरी परतत असताना नामदेव पुजारी यांच्या घराजवळील रस्त्यावर ही घटना घडली. फिर्यादीच्या म्हणण्यानुसार, त्यांच्या पाड्याने (बैलाने) आरोपीच्या भातशेतीचे नुकसान केल्याचा राग आरोपीच्या मनात होता. त्याच कारणावरून आरोपीने त्यांना अडवून वाद घातला.
डोळ्यावर ठोसा, कोयता घेऊन अंगावर धावल्याचा आरोप
तक्रारीनुसार, आरोपी अनंत तुकाराम शिवगण (वय ३८) याने फिर्यादीच्या डाव्या डोळ्यावर हाताने ठोसा मारून दुखापत केली. त्यानंतर “तुला आता ठार मारतो” अशी धमकी देत कोयता हातात घेऊन फिर्यादीच्या अंगावर धावून आला तसेच शिवीगाळ केल्याचा आरोप तक्रारीत करण्यात आला आहे.
राजापूर पोलिसांत गुन्हा दाखल
या प्रकरणी राजापूर पोलीस ठाण्यात गुन्हा क्रमांक १९७/२०२६ नोंद करण्यात आला असून भारतीय न्यायसंहिता (BNS) २०२३ मधील कलम ११७(२), ११५(२), ३५२, ३५१(२) आणि १३१ अंतर्गत गुन्हा दाखल करण्यात आला आहे. पुढील तपास राजापूर पोलीस करीत आहेत.
