नवजात अतिदक्षता विभागात विशेष कार्यक्रमाचे आयोजन; परिचर्या प्रशिक्षण विद्यालयाच्या विद्यार्थ्यांकडून प्रभावी पथनाट्य सादर
रत्नागिरी:
World Breastfeeding Week निमित्त १ ऑगस्ट ते ७ ऑगस्ट २०२६ दरम्यान राबवल्या जाणाऱ्या उपक्रमांतर्गत शासकीय वैद्यकीय महाविद्यालय व जिल्हा रुग्णालय, रत्नागिरी येथील नवजात अतिदक्षता विभागात (NICU) जागतिक स्तनपान दिन मोठ्या उत्साहात साजरा करण्यात आला. या कार्यक्रमाच्या माध्यमातून स्तनपानाचे महत्त्व आणि बालकांच्या आरोग्याविषयी जनजागृती करण्यात आली.
या प्रसंगी जिल्हा शल्यचिकित्सक डॉ. भास्कर जगताप, निवासी वैद्यकीय अधिकारी डॉ. अंकुश शिरसाट, रुग्णालय प्रशिक्षण केंद्राचे वैद्यकीय अधिकारी डॉ. वसीम सय्यद, अधिसेविका श्रीमती शिल्पा घाडगे यांच्यासह परिचर्या संवर्ग आणि इतर वैद्यकीय अधिकारी व कर्मचारी मोठ्या संख्येने उपस्थित होते. कार्यक्रमा दरम्यान परिचर्या प्रशिक्षण विद्यालयाच्या विद्यार्थ्यांनी स्तनपानाचे महत्त्व अधोरेखित करणारे एक प्रभावी पथनाट्य सादर केले, ज्याला उपस्थितांकडून उत्स्फूर्त प्रतिसाद मिळाला.
कार्यक्रम प्रसंगी उपस्थितांना आणि मातांना स्तनपानासंदर्भात खालील महत्त्वपूर्ण मुद्द्यांवर सविस्तर मार्गदर्शन करण्यात आले:
- पहिल्या तासाचे महत्त्व: बाळाच्या जन्मानंतर पहिल्या एका तासातच स्तनपान सुरू करणे अत्यंत आवश्यक आहे.
- निव्वळ स्तनपान: बाळाच्या जन्मापासून पहिले सहा महिने केवळ आईचेच दूध (निव्वळ स्तनपान) दिले पाहिजे.
- पूरक आहार: सहा महिने पूर्ण झाल्यानंतर बाळाला आईच्या दुधासोबत योग्य व पोषक पूरक आहार सुरू करावा.
- कुपोषण निर्मूलन: बालकांमधील कुपोषण आणि बालमृत्यूचे प्रमाण कमी करण्यासाठी वेळेवर व नियमित स्तनपान मुख्य भूमिका बजावते.
- सकारात्मक वातावरण: घर, कार्यस्थळ आणि सार्वजनिक ठिकाणी स्तनदा मातांसाठी अनुकूल व सुरक्षित वातावरण निर्माण करण्याची नितांत गरज आहे.
या वेळी बोलताना जिल्हा शल्यचिकित्सक डॉ. भास्कर जगताप यांनी उपस्थित मातांना स्तनपानाचे शास्त्रीय महत्त्व समजावून सांगितले आणि समाजाने स्तनदा मातांसाठी पोषक व सहकार्याचे वातावरण निर्माण करण्याचे आवाहन केले. कार्यक्रमाच्या सांगतेवेळी रुग्णालयात उपस्थित सर्व स्तनदा मातांना पोषक खाऊचे वाटप करण्यात आले.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:26 06-08-2026
