ठाकरे गट सोडलेले ६ खासदार आणि एकनाथ शिंदे यांची दिल्लीत खलबते; मंत्रिमंडळ विस्ताराबाबत निर्णयाची शक्यता
नवी दिल्ली / मुंबई:
दिल्लीत सध्या महाराष्ट्राच्या राजकारणाच्या दृष्टीने अत्यंत महत्त्वाच्या घडामोडी घडत आहेत. एकीकडे सर्वोच्च न्यायालयात शिवसेना पक्ष, ‘धनुष्यबाण’ चिन्ह आणि आमदार अपात्रता प्रकरणावर निर्णायक सुनावणी सुरू असताना, दुसरीकडे राजधानीत राजकीय सत्तानाट्याला नवी दिशा मिळताना दिसत आहे. ठाकरे गट (शिवसेना UBT) सोडून नुकताच शिवसेनेत (शिंदे गट) प्रवेश केलेल्या सहा खासदारांसह पक्षाचे इतर प्रमुख खासदार दिल्लीत तळ ठोकून आहेत.
केंद्रीय गृहमंत्री अमित शाह यांची ५० मिनिटांची भेट घेतल्यानंतर, आता हे सर्व खासदार पंतप्रधान नरेंद्र मोदी यांची भेट घेणार असून, पंतप्रधान मोदी या खासदारांना काय कानमंत्र देणार, याकडे राजकीय वर्तुळाचे लक्ष लागले आहे.
विकासकामे आणि संभाव्य मंत्रिमंडळ विस्तारावर चर्चा
मिळालेल्या प्राथमिक माहितीनुसार, या प्रस्तावित बैठकीत शिवसेना खासदारांच्या मतदारसंघातील प्रलंबित विकासकामे, लोककल्याणकारी योजना आणि निधी वितरणाबाबत सविस्तर चर्चा होणार आहे.
याशिवाय, केंद्रातील संभाव्य मंत्रिमंडळ विस्तार आणि नव्या खासदारांपैकी कोणाला स्थान द्यायचे, या संदर्भात उपमुख्यमंत्री एकनाथ शिंदे आणि पंतप्रधान नरेंद्र मोदी यांच्यात महत्त्वपूर्ण चर्चा होण्याची शक्यता वर्तवली जात आहे.
सर्वोच्च न्यायालयातील सुनावणी अंतिम टप्प्यात
दरम्यान, सर्वोच्च न्यायालयात शिवसेना पक्षचिन्ह आणि अपात्रतेचा खटला अंतिम टप्प्यात पोहोचला असून दोन्ही बाजूंचे विधिज्ञ जोरदार कायदेशीर युक्तिवाद करत आहेत. त्यामुळे सर्वोच्च न्यायालयाचा निकाल आणि दिल्लीतील या राजकीय गाठीभेटींमुळे महाराष्ट्राच्या राजकारणात मोठे फेरबदल होण्याची शक्यता व्यक्त केली जात आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
13:52 07-08-2026
