कुणबी प्रमाणपत्रावर ओबीसी जागेवरून निवडणूक लढवणाऱ्यांना पाठिंबा नाही; धाराशिवमध्ये पत्रकारांशी बोलताना जरांगेंचं मोठं वक्तव्य
धाराशिव: Manoj Jarange Patil on Kunbi Certificate (मनोज जरांगे पाटील यांची कुणबी प्रमाणपत्रावर भूमिका): “मी कोणत्याही राजकारणासाठी किंवा निवडणुकीसाठी नाही, तर माझ्या गरीब मराठा समाजाला हक्काचे आरक्षण मिळावे यासाठीच लढत आहे. ही माझी सुरुवातीपासूनचीच आणि ठाम भूमिका आहे,” असे मत मराठा आरक्षण आंदोलक मनोज जरांगे पाटील यांनी व्यक्त केले आहे. धाराशिव येथे पत्रकारांशी संवाद साधताना त्यांनी आरक्षण, निवडणूक आणि राजकीय नेत्यांच्या भूमिकेवर सडेतोड भाष्य केले.
“कुणबी प्रमाणपत्रावर निवडणूक लढवणाऱ्यांना माझा पाठिंबा नाही”
कुणबी प्रमाणपत्र मिळवून त्या आधारे ओबीसी आरक्षित जागेवर निवडणूक लढवणाऱ्यांबाबत मनोज जरांगे पाटील यांनी अत्यंत महत्त्वपूर्ण वक्तव्य केले. “माझा अशा लोकांना कधीही पाठिंबा नव्हता आणि पुढेही असणार नाही. जर तुमच्याकडे अधिकृत व्हॅलिडिटी (जात वैधता प्रमाणपत्र) असेल, तरच निवडणुकीच्या असल्या कुटाण्यात पडा, असा सल्ला मी मराठा समाजाला नेहमी देत असतो. मी कोणाचाही मिंधा नाही, मग ती महाविकास आघाडी असो किंवा महायुती असो. मला कोणाच्या मित्रत्वाची गरज नाही, मला माझ्या समाजाचे हित आणि मराठा समाजातील लेकराबाळांना अधिकारी बनवणे महत्त्वाचे आहे,” असा इशारा त्यांनी दिला.
उपमुख्यमंत्री एकनाथ शिंदेंवर पुन्हा निशाणा
धाराशिव येथील दौऱ्यादरम्यान मनोज जरांगे पाटील यांनी पुन्हा एकदा उपमुख्यमंत्री एकनाथ शिंदे यांच्यावर जोरदार हल्लाबोल केला. “आम्ही तुमची स्तुती केली म्हणून तुम्ही सगेसोयरे आणि प्रमाणपत्रांचे निर्णय मागे घेणार किंवा रद्द करणार असाल, तर मला अशा मित्रापेक्षा माझा समाज महत्त्वाचा आहे. आमच्या पोरांचे मुडदे पडावेत का? जर तुम्ही मराठा समाजाचे नुकसान करणार असाल, तर समाज हे कधीही सहन करणार नाही,” असा सवाल करत त्यांनी एकनाथ शिंदेंच्या भूमिकेवर तीव्र नाराजी व्यक्त केली.
प्रसाद लाड यांचे कौतुक तर प्रवीण दरेकर आणि लक्ष्मण हाकेंवर टोला
आपल्या संवादादरम्यान जरांगे पाटील यांनी भाजप आमदार प्रसाद लाड यांचे कौतुक केले. “प्रसाद लाड यांना मनापासून वाटते की मराठा समाजाचे कल्याण व्हावे. ते या विषयावर सतत धावपळ करतात. मात्र, त्यांच्या समोरील सहकाऱ्यांनी आणि मित्रांनीही त्यांना योग्य तो प्रतिसाद देण्याची गरज आहे,” असे जरांगे म्हणाले.
त्याच वेळी भाजप नेते प्रवीण दरेकर यांचा उल्लेख करत त्यांनी “बिगर मिशीचा” असा खोचक टोला लगावला. तर, प्रसाद लाड यांच्यावर टीका करणाऱ्या ओबीसी आंदोलक लक्ष्मण हाके यांचे नाव न घेता, “आम्ही अशा लोकांना मोजत नाही, त्यांना कोलतो,” अशा शब्दांत जरांगे यांनी समाचार घेतला. मराठा समाजाला मिळालेली कुणबी प्रमाणपत्रे रद्द करण्याचा कोणताही डाव मी कधीही यशस्वी होऊ देणार नाही, असा निर्धारही त्यांनी शेवटी व्यक्त केला.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:21 08-08-2026
