माजी सैनिकांच्या पाल्यांना मिळणार शिष्यवृत्तीचा लाभ; मुदतीपूर्वी अर्ज करण्याचे आवाहन
PM Scholarship Scheme Ratnagiri अंतर्गत शैक्षणिक वर्ष २०२६-२७ साठी ‘प्रधानमंत्री शिष्यवृत्ती योजना’ (Prime Minister Scholarship Scheme) ची नवीन ऑनलाईन अर्ज प्रक्रिया अधिकृतपणे सुरू झाली आहे. माजी सैनिकांच्या पात्र आणि गरजू पाल्यांना उच्च शिक्षणासाठी आर्थिक मदत पुरवण्याच्या उद्देशाने ही योजना राबवली जाते. या योजनेचा लाभ घेऊ इच्छिणाऱ्या विद्यार्थ्यांनी केएसबीच्या www.ksb.gov.in या अधिकृत संकेतस्थळावर जाऊन ऑनलाईन पद्धतीने अर्ज सादर करावेत, असे निर्देश देण्यात आले आहेत.
या योजनेअंतर्गत अर्ज भरताना विद्यार्थ्यांनी आपली सर्व आवश्यक कागदपत्रे आणि प्रमाणपत्रे डिजिटल स्वरूपात संकेतस्थळावर अपलोड करणे बंधनकारक आहे. शैक्षणिक वर्ष २०२६-२७ करीता ऑनलाईन अर्ज सादर करण्याची अंतिम मुदत ३१ डिसेंबर २०२६ ही निश्चित करण्यात आली आहे. मुदतीनंतर प्राप्त होणारे किंवा अपूर्ण असलेले अर्ज कोणत्याही परिस्थितीत स्वीकारले जाणार नाहीत, असा स्पष्ट इशारा प्रशासनाकडून देण्यात आला आहे.
PM Scholarship Scheme Ratnagiri: मुदतीपूर्वी अर्ज करण्याचे जिल्हा सैनिक कल्याण कार्यालयाचे आवाहन
निश्चित केलेल्या अंतिम मुदतीनंतर जिल्हा सैनिक कल्याण कार्यालयाकडून एकाही अर्जाची दखल घेतली जाणार नाही, त्यामुळे पात्र विद्यार्थ्यांनी मुदतीचा वाट न पाहता वेळेत आपले अर्ज सादर करावेत, असे आवाहन रत्नागिरीचे जिल्हा सैनिक कल्याण अधिकारी प्रविंद बिरादार यांनी केले आहे.
रत्नागिरी जिल्ह्यातील आजी-माजी सैनिकांच्या पाल्यांनी या कल्याणकारी योजनेची दखल घेऊन संकेतस्थळाला भेट द्यावी. अर्जाशी संबंधित आवश्यक सर्व कागदपत्रांची पूर्तता करून वेळेत प्रक्रिया पूर्ण करावी, जेणेकरून पात्र विद्यार्थ्यांना शिष्यवृत्तीचा योग्य लाभ वेळेत मिळू शकेल.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
16:47 15-08-2026
