श्रावण महिन्याच्या पार्श्वभूमीवर श्री क्षेत्र मार्लेश्वर देवस्थान ट्रस्टचा निर्णय; भाविकांना भारतीय संस्कृतीनुसार वेशभूषा करण्याचे आवाहन
साडवली (संगमेश्वर):
Marleshwar Dress Code 2026 अंतर्गत संगमेश्वर तालुक्यातील प्रसिद्ध ‘श्री क्षेत्र मार्लेश्वर’ मंदिर प्रवेशाबाबत देवस्थान ट्रस्टतर्फे अधिकृत नियमावली जाहीर करण्यात आली आहे. पवित्र श्रावण महिन्याला प्रारंभ झाल्याने मंदिरात भाविकांची होणारी मोठी गर्दी विचारात घेऊन देवस्थान ट्रस्ट समितीने मंदिर प्रवेशासाठी वस्त्रसंहिता (ड्रेस कोड) लागू केली आहे. मंदिरात येणाऱ्या भाविकांनी तसेच पर्यटकांनी मंदिराचे पावित्र्य आणि भारतीय संस्कृतीचे भान ठेवून योग्य वेशभूषेतच दर्शन घ्यावे, असे स्पष्ट आवाहन ट्रस्टतर्फे करण्यात आले आहे.
असभ्य व तोकड्या वस्त्रांवर गाभाऱ्यात बंदी
श्री क्षेत्र मार्लेश्वर देवस्थान ट्रस्टने प्रसिद्ध केलेल्या सूचनेनुसार, मंदिरात अंगप्रदर्शन करणारे, असभ्य, अशोभनीय, तोकडे वस्त्र तसेच असात्विक वेशभूषा करून आलेल्या भाविकांना आणि पर्यटकांना मंदिराच्या गाभाऱ्यात प्रवेश दिला जाणार नाही.
ट्रस्टतर्फे जारी करण्यात आलेल्या प्रमुख सूचना:
- योग्य वेशभूषा अनिवार्य: भाविकांनी भारतीय संस्कृतीचे पालन करून संपूर्ण अंग झाकणाऱ्या (अंगभर) वेशभूषेतच मंदिरात प्रवेश करावा.
- अंगप्रदर्शन करणाऱ्या कपड्यांवर बंदी: तोकडे आणि असात्विक कपडे परिधान करणाऱ्यांना गाभाऱ्यात प्रवेश नाकारला जाईल.
- प्रशासनास सहकार्याचे आवाहन: मंदिरात येणाऱ्या सर्व भक्तांनी व पर्यटकांनी देवस्थानच्या नियमांचे काटेकोर पालन करावे आणि मंदिर प्रशासनास पूर्ण सहकार्य करावे.
श्रावण महिन्यात भाविकांची मोठी गर्दी
हिंदू धर्मात अतिशय महत्त्वाच्या मानल्या जाणाऱ्या श्रावण महिन्यात संगमेश्वर तालुक्यातील मार्लेश्वर देवस्थानात दरवर्षी हजारो भाविक आणि पर्यटक दर्शनासाठी येतात. या काळात मंदिरातील धार्मिक वातावरण आणि पवित्रता टिकून राहावी, यासाठी देवस्थान ट्रस्ट समितीने हे पाऊल उचलले आहे. स्थानिक नागरिकांसह भाविकांनीही या निर्णयाचे स्वागत केले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:23 17-08-2026
