Ratnagiri Rainfall Update: रत्नागिरी जिल्ह्यात अडीच महिन्यांत सरासरी ६१.४५ टक्के पाऊस; गतवर्षापेक्षा २ टक्क्यांनी वाढ

यंदा २ हजार ६७ मिमी पावसाची नोंद, ऑगस्टच्या दुसऱ्या आठवड्यानंतर पावसाचा जोर पुन्हा वाढला

रत्नागिरी:

कोकणातील रत्नागिरी जिल्ह्यात १ जून ते १५ ऑगस्ट या अडीच महिन्यांच्या कालावधीत आतापर्यंत एकूण २ हजार ६७.४६ मिमी म्हणजेच सरासरी ६१.४५ टक्के इतका पाऊस पडला आहे. यंदाच्या मोसमात सुरुवातीला पावसाने दिलेला ताण आणि उशिरा झालेले आगमन यानंतरही गतवर्षीच्या तुलनेत यंदा सुमारे २ टक्के अधिक पाऊस नोंदवला गेला आहे. गतवर्षी याच कालावधीत सरासरी २ हजार मिमी म्हणजेच ५९.६४ टक्के पावसाची नोंद झाली होती.

सुरुवातीचा ताण, टँकरची धावपळ आणि धरणातील पाणीसाठा

यंदा जून महिन्याच्या सुरुवातीला जिल्ह्यात पावसाने हजेरी लावली नव्हती. त्यामुळे ऐन उन्हाळ्यात जिल्ह्यातील १८ पाण्याच्या टँकरद्वारे विविध वाड्या, वस्त्या आणि गावांमध्ये पाणीपुरवठा करावा लागत होता. नदी आणि धरणातील पाणीसाठा वेगाने कमी झाल्याने संपूर्ण जिल्ह्यावर दुष्काळाचे सावट पसरले होते.

मात्र, जून महिन्याच्या शेवटच्या आठवड्यात पावसाने जोरदार पुनरागमन केले. त्यानंतर जुलैच्या पहिल्या आठवड्यात झालेल्या मुसळधार पावसाने संपूर्ण जिल्ह्याला झोडपून काढले. यामुळे नद्या व धरणातील पाणीसाठा झपाट्याने वाढला, टँकर पूर्णपणे बंद झाले आणि जिल्ह्यावरील पाणीसंकट दूर झाले.

भातशेतीला जीवनदान आणि दुबार पेरणीचे संकट टळले

जुलै महिन्यातील पावसामुळे जिल्ह्यातील ४७ हजार हेक्टरहून अधिक क्षेत्रावर भाताची पुनर्लागवड यशस्वीरीत्या पूर्ण झाली आहे. मुसळधार पावसामुळे भात पिकांना मोठे जीवनदान मिळाले असून शेतकऱ्यांवरील दुबार पेरणीचे संकट टळले. ऑगस्टच्या पहिल्या आठवड्यात पावसाचा जोर काहीसा ओसरला होता; परंतु १३ ऑगस्टनंतर जिल्ह्यात पावसाचा जोर पुन्हा वाढला आहे. जिल्ह्यात आतापर्यंत सर्व तालुक्यांचा मिळून एकूण १८ हजार ३७९ मिमी पाऊस झाला असून, गतवर्षी हाच आकडा १८ हजार ५७ मिमी इतका होता.

तालुकानिहाय पावसाची आकडेवारी (टक्केवारीमध्ये)

दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:13 18-08-2026