Rahul Narwekar on Kapil Sibal: ‘माझा निर्णय कायद्याच्या चौकटीतच’; कपिल सिब्बल यांच्या आरोपांवर राहुल नार्वेकरांचे थेट प्रत्युत्तर

कपिल सिब्बलांचे दावे बिनबुडाचे; यवतमाळमध्ये प्रसारमाध्यमांशी बोलताना विधानसभा अध्यक्षांचे प्रत्युत्तर

यवतमाळ / नवी दिल्ली:

Rahul Narwekar on Kapil Sibal (राहुल नार्वेकर विरुद्ध कपिल सिब्बल): सर्वोच्च न्यायालयात सध्या शिवसेना पक्ष आणि चिन्हाच्या संदर्भात महत्त्वपूर्ण सुनावणी सुरू आहे. शिवसेना ठाकरे गटाच्या वतीने ज्येष्ठ वकील कपिल सिब्बल न्यायालयात बाजू मांडत आहेत. सुनावणीदरम्यान सिब्बल यांनी महाराष्ट्र विधानसभा अध्यक्ष राहुल नार्वेकर यांनी दिलेल्या निर्णयावर तीव्र आक्षेप नोंदवत, अध्यक्षांनी अधिकारांची मर्यादा ओलांडल्याचा आरोप केला. सिब्बल यांच्या या वक्तव्यानंतर राहुल नार्वेकर यांनी यवतमाळ येथे प्रसारमाध्यमांशी बोलताना सिब्बल यांचे सर्व दावे बिनबुडाचे असल्याचे सांगत जोरदार प्रत्युत्तर दिले.

नेमकं काय म्हणाले विधानसभा अध्यक्ष राहुल नार्वेकर?

कपिल सिब्बल यांच्या वक्तव्याचा समाचार घेताना राहुल नार्वेकर म्हणाले की, कपिल सिब्बल हे त्यांच्या पक्षकारासाठी न्यायालयात युक्तिवाद करत आहेत, त्यामुळे त्यांनी केलेल्या विधानांवरून काहीही सिद्ध होत नाही.

• कायद्याच्या चौकटीत निर्णय: “मी जी भूमिका घेतली आहे आणि जो निर्णय दिला आहे, तो संपूर्णपणे कायद्याच्या चौकटीत राहून दिलेला निर्णय आहे. सर्वोच्च न्यायालयाने जे निकष ठरवून दिले होते, त्या निकषांच्या आधारावरच मी हा निर्णय दिला आहे.”
• शाश्वत निर्णय: “सामनेवाले वकीलांनी युक्तिवाद केला म्हणजे ते सत्य ठरत नाही. अध्यक्षांनी काय ठरवलं हे सिब्बल यांना आधीच कसे समजले? अशा बिनबुडाच्या आरोपांनी काहीही फरक पडत नाही. मी दिलेला निर्णय हा अत्यंत शाश्वत असून त्यात कोणताही बदल होईल असे मला वाटत नाही,” असा ठाम विश्वास नार्वेकर यांनी व्यक्त केला.

Rahul Narwekar on Kapil Sibal: कोर्टात कपिल सिब्बल यांचा काय होता युक्तिवाद?

सर्वोच्च न्यायालयात ठाकरेंच्या बाजूने जोरदार युक्तीवाद करताना कपिल सिब्बल यांनी नार्वेकरांच्या निर्णयावर प्रश्नचिन्ह उपस्थित केले होते. सिब्बल म्हणाले की:

व्हिप आणि पक्षाची घटना: “अधिकृत व्हिप आमच्याकडेच होता आणि अध्यक्षांच्या निवडीविरोधात आम्ही व्हिप जारी केला होता. निवडणूक आयोगाच्या (ECI) रेकॉर्डवर १९९९ ची पक्षाची घटना उपलब्ध असताना, अध्यक्षांनी पक्षाच्या घटनेची तपासणी कशाच्या आधारे केली? या सर्व बाबींमध्ये लक्ष घालण्याचे अधिकार अध्यक्षांना नक्की कुठून मिळाले?” असा थेट सवाल सिब्बल यांनी सर्वोच्च न्यायालयात विचारला.

विशिष्ट निष्कर्षापर्यंत पोहोचण्यासाठी तर्क: “विधानसभा अध्यक्षांना काय निर्णय घ्यायचा आहे हे आधीपासूनच माहित होते. तो विशिष्ट निष्कर्ष काढण्यासाठी त्यांनी गुंतागुंतीचा तर्क मांडला.”

दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:16 19-08-2026