‘Julius Baer Mobile’ ट्रेडिंग ॲपद्वारे आर्थिक फसवणूक
रत्नागिरी:
Ratnagiri Cyber Fraud News (रत्नागिरी सायबर फसवणूक बातमी): कमी वेळेत जास्त परतावा आणि भरघोस नफा मिळवून देण्याचे आमिष दाखवून सायबर भामट्यांनी कुवारबाव येथील एका दांपत्याची तब्बल ११ लाख ३७ हजार रुपयांची फसवणूक केल्याचा गंभीर प्रकार उघडकीस आला आहे. २५ जून २०२६ ते २३ जुलै २०२६ या कालावधीत हा ऑनलाईन फ्रॉड घडला असून, याप्रकरणी १८ ऑगस्ट २०२६ रोजी रत्नागिरी शहर पोलिस ठाण्यात गुन्हा नोंदवण्यात आला आहे.
व्हॉट्सॲप ओळखीवरून विश्वासाचा घात
पोलिसांनी दिलेल्या माहितीनुसार, मुख्य आरोपी सोनल जगन्नाथ नाईक हिने तक्रारदार महिलेच्या पतीशी व्हॉट्सॲपवर संपर्क साधून ओळख वाढवली. संशयित आरोपीने दांपत्याचा पूर्ण विश्वास संपादन केला.
त्यानंतर, तक्रारदाराच्या पतीच्या मोबाईलमध्ये ‘Julius Baer Mobile’ नावाचे बनावट ट्रेडिंग ॲप्लिकेशन डाउनलोड करून लॉगइन करण्यास भाग पाडले. या ॲपच्या माध्यमातून आयपीओ (IPO) आणि ओटीसी (OTC) ट्रेडिंगमध्ये गुंतवणूक केल्यास कमी वेळेत मोठा नफा मिळेल असे आमिष दाखवून वेळोवेळी लाखो रुपये गुंतवण्यास लावण्यात आले.
Ratnagiri Cyber Fraud News: धमकवून उकळले ११.३७ लाख रुपये
प्रकरणात पुढे जाऊन दुसऱ्या आरोपीने प्रवेश केला. कुणाल सुमया असे नाव सांगणाऱ्या भामट्याने स्वत:ला ‘Julius Baer Mobile’ कंपनीचा प्रमुख (Head) असल्याचे भासवाले. “कंपनीच्या नियमांनुसार तुम्हाला पूर्ण रक्कम भरावीच लागेल,” असे सांगून त्याने तक्रारदार दांपत्याला धमकावण्यास सुरुवात केली आणि पैसे उकळले.
या ऑनलाईन फसवणुकीत:
- संयुक्त खात्यातून (Joint Account): ११ लाख १७ हजार रुपये
- पतीच्या वैयक्तिक खात्यातून: २० हजार रुपये
- एकूण फसवणूक: ११ लाख ३७ हजार रुपये
सायबर भामट्यांवर भारतीय न्याय संहितेनुसार गुन्हा
आपली फसवणूक झाल्याचे लक्षात आल्यानंतर पीडित महिलेने तात्काळ पोलिसांत धाव घेतली. तिच्या तक्रारीवरून रत्नागिरी शहर पोलिसांनी संशयित सोनल जगन्नाथ नाईक आणि कुणाल सुमया यांच्याविरोधात:
- भारतीय न्याय संहिता (BNS) २०२३: कलम ३१८ (४), ३१९ (२), ३(५)
- माहिती तंत्रज्ञान कायदा (IT Act) २०००: कलम ६६ (C), ६६ (D)
या कायद्यांनुसार गुन्हा दाखल केला आहे. या सायबर गुन्ह्याचा पुढील तपास शहर पोलिस करत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:26 19-08-2026
