लाभार्थी संख्या २ कोटी ४८ लाखांवरून १ कोटी ६५ लाखांवर; अपात्र व्यक्तींकडून अद्याप पूर्ण वसुली नाही
मुंबई:
Ladki Bahin Yojana Ineligible Beneficiaries संदर्भात राज्य सरकारच्या बहुचर्चित ‘मुख्यमंत्री माझी लाडकी बहीण योजने’बाबत एक अत्यंत धक्कादायक माहिती समोर आली आहे. माहिती अधिकार (RTI) कायद्यांतर्गत मिळालेल्या अधिकृत माहितीनुसार, राज्यातील तब्बल ९२ लाख महिलांना या योजनेसाठी अपात्र ठरविण्यात आले आहे. यामुळे सुरुवातीला २ कोटी ४८ लाखांवर असलेला लाभार्थी महिलांचा आकडा आता थेट १ कोटी ६५ लाखांवर आला आहे.
छाननी प्रक्रियेत ९२ लाख अर्ज बाद
योजनेच्या सुरुवातीच्या टप्प्यात राज्यभरातून महिलांनी मोठ्या प्रमाणावर अर्ज केले होते. मात्र, प्रशासनाकडून अर्जांची सखोल पडताळणी सुरू झाल्यानंतर वार्षिक उत्पन्न, शासकीय नोकरी, करदाते असणे, इतर योजनांचा दुहेरी लाभ आणि इतर निकषांच्या आधारे अर्जांची कडक छाननी करण्यात आली. या छाननी प्रक्रियेत पात्रता पूर्ण न करू शकलेल्या तब्बल ९२ लाख महिलांचे अर्ज अपात्र ठरवण्यात आले आहेत. सध्या राज्यात १.६५ कोटी महिलांनाच या योजनेचा प्रत्यक्ष लाभ मिळत असल्याचे स्पष्ट झाले आहे.
अपात्र लाभार्थ्यांकडून वसुलीचा प्रश्न ऐरणीवर
पात्र नसतानाही काही शासकीय कर्मचारी आणि अन्य अपात्र व्यक्तींनी या योजनेचा बेकायदेशीरपणे लाभ घेतल्याचे यापूर्वी उघडकीस आले होते. मात्र, अशा अपात्र लाभार्थ्यांकडून शासनाने वाटप केलेल्या रक्कमेची अद्याप पूर्ण वसुली झालेली नाही, ही गंभीर बाबही RTI मधून उघड झाली आहे. त्यामुळे अपात्र ठरलेल्यांवर नेमकी कोणती कारवाई होणार आणि शासकीय निधीची वसुली कधी होणार, हा प्रश्न पुन्हा एकदा ऐरणीवर आला आहे.
Ladki Bahin Yojana Ineligible Beneficiaries: अपात्रांचा आकडा आणखी वाढण्याची शक्यता
पारदर्शकतेसाठी प्रशासनाकडून सातत्याने तपासणी
राज्य सरकारकडून सध्या लाभार्थ्यांच्या अर्जांची, कागदपत्रांची आणि माहितीची नियमित तपासणी प्रक्रिया सुरू आहे. योजनेत पूर्ण पारदर्शकता राखण्यासाठी ही छाननी सतत चालू ठेवली जात असून, येत्या काळात अपात्र लाभार्थ्यांची ही संख्या आणखी वाढण्याची शक्यता वर्तवली जात आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:52 20-08-2026
