राहुल गांधींच्या पुणे दौऱ्यावरील अटींवरून पोलिसांवर आणि सरकारवर ताशेरे
पुणे / मुंबई:
शिवसेनेचे नाव आणि चिन्ह यासंदर्भात सर्वोच्च न्यायालयात सुरू असलेल्या सुनावणीच्या पार्श्वभूमीवर, तसेच काँग्रेस नेते आणि लोकसभेतील विरोधी पक्षनेते राहुल गांधी यांच्या पुणे दौऱ्यावरून ठाकरे गटाचे खासदार संजय राऊत यांनी सत्ताधाऱ्यांवर कडाडून टीका केली आहे. “गद्दारांना कोणताही युक्तीवाद नसतो, तो केवळ एक फुटीर गट आहे,” असे म्हणत राऊत यांनी शिंदे गटावर निशाणा साधला.
विरोधी पक्षनेत्यांच्या कार्यक्रमांवर अटी का? राऊतांचा प्रशासनाला सवाल
राहुल गांधी यांच्या पुण्यातील ‘छात्रों की गूंज’ कार्यक्रमाचा संदर्भ देत संजय राऊत म्हणाले, “राहुल गांधी या देशाचे नेते आहेत. ते परदेशातून आलेत का? पुण्यात अमित शाह किंवा इतर सत्ताधारी नेते येतात, तेव्हा त्यांच्यावर अशा अटी घातल्या जातात का?”
पुणे पोलिसांनी या कार्यक्रमासाठी तब्बल ३० अटी घातल्याचा दावा करत राऊत यांनी, “भाजपच्या पायाखालची वाळू सरकली असून ते राहुल गांधींना घाबरले आहेत,” असा टोला लगावला.
“वंदे मातरम आणि भाजपचा संबंध तरी काय?”
वंदे मातरमच्या मुद्द्यावरूनही संजय राऊत यांनी भाजपवर जोरदार हल्लाबोल केला:
- स्वातंत्र्य लढा आणि काँग्रेस: वंदे मातरमचा संबंध भारताच्या स्वातंत्र्यलढ्याशी आणि काँग्रेसशी आहे. १९३२ च्या काँग्रेस कमिटीमध्ये नेताजी सुभाषचंद्र बोस आणि सरदार वल्लभभाई पटेल यांनी वंदे मातरमची दोन कडवी अधिकृतपणे स्वीकारली होती.
- भाजपवर टीका: ज्यांचा स्वातंत्र्यलढ्याशी कधी संबंध आलाच नाही, त्यांनी वंदे मातरमवरून नसती उठाठेव करू नये.
“मी राहुल गांधींना सुरुवातीपासून नेता मानत आलोय”
राहुल गांधी यांच्या नेतृत्वाबाबत बोलताना राऊत म्हणाले, “जेव्हा लोक राहुल गांधी यांची टिंगल करत होते, तेव्हापासून मी ते या देशाचे नेतृत्व करतील असे सांगत होतो. भविष्यात भाजपच्या नेत्यांना संसदेत राहुल गांधींसमोर विरोधी पक्षात बसावे लागणार आहे, याची त्यांनी आतापासूनच मानसिक तयारी करून ठेवावी.”
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:17 22-08-2026
