४ लाख ४८ हजार उद्दिष्टांपैकी ३ लाख ८८ हजार घरांमध्ये नळ; गुहागर तालुका ९४.७० टक्क्यांसह जिल्ह्यात प्रथम
जलजीवन मिशन रत्नागिरी जिल्ह्यात ग्रामीण भागातील प्रत्येक घरापर्यंत शुद्ध पिण्याचे पाणी पोहोचवण्यासाठी वेगाने राबवले जात असून या मोहिमेला मोठे यश मिळत आहे. केंद्र आणि राज्य सरकारच्या या महत्त्वाकांक्षी योजनेच्या माध्यमातून ग्रामीण भागातील कानाकोपऱ्यात घरोघरी कार्यात्मक नळजोडणी (एफएचटीसी) देण्याचे काम आतापर्यंत ८६.७० टक्के पूर्ण झाले आहे. या कामगिरीमुळे रत्नागिरीच्या ग्रामीण भागातील हजारो कुटुंबांचा पिण्याच्या पाण्याचा प्रश्न कायमचा सुटण्यास मदत झाली आहे.
उपलब्ध अधिकृत आकडेवारीनुसार, संपूर्ण रत्नागिरी जिल्ह्यात एकूण ४ लाख ४८ हजार १६१ नळजोडण्या देण्याचे उद्दिष्ट निश्चित करण्यात आले होते. या निर्धारित उद्दिष्टांपैकी प्रत्यक्षात ३ लाख ८८ हजार ५३८ घरांमध्ये नळजोडणीचे काम पूर्ण झाले आहे. उर्वरित ५९ हजार ६२३ नळजोडण्यांचे काम सध्या जिल्हाभरात वेगाने सुरू असून, लवकरच रत्नागिरी जिल्हा १०० टक्के नळजोडणीचा टप्पा गाठण्याच्या मार्गावर आहे.
तालुकानिहाय कामगिरीचा विचार केल्यास, गुहागर तालुक्याने जिल्ह्यात अव्वल स्थान पटकावले आहे. गुहागरमध्ये निश्चित केलेल्या ४२ हजार ५६१ उद्दिष्टांपैकी ४० हजार ३०६ घरांमध्ये (९४.७० टक्के) नळजोडण्या पूर्ण झाल्या असून, केवळ २ हजार २५५ कामे शिल्लक आहेत. त्या पाठोपाठ चिपळूण तालुक्याने ९३.१५ टक्के (६४,६४४ नळजोडण्या), दापोली तालुक्याने ९२.४८ टक्के (४५,४३१ नळजोडण्या) आणि मंडणगड तालुक्याने ९०.७४ टक्के (१८,२६५ नळजोडण्या) प्रगती करत उत्कृष्ट कामगिरी नोंदवली आहे.
इतर तालुक्यांमध्येही या योजनेचे काम वेगाने सुरू आहे. लांजा तालुक्यात ८८.६७ टक्के (२३,२७१ पूर्ण), रत्नागिरी तालुक्यात ८५.८६ टक्के (५९,६०७ पूर्ण), संगमेश्वर तालुक्यात ८१.७७ टक्के (५१,४८१ पूर्ण), राजापूर तालुक्यात ८१.१७ टक्के (४०,९६० पूर्ण) आणि खेड तालुक्यात ७७.०४ टक्के (४४,५७३ पूर्ण) नळजोडण्यांचे काम पूर्ण झाले आहे. जिल्हा प्रशासनाच्या नियोजनामुळे ग्रामीण भागातील पाणीटंचाई दूर होण्यास मोठी मदत होत आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
13:10 28-08-2026
