MPSC Exam Controversies मुळे स्पर्धा परीक्षांची पारदर्शकता धोक्यात; २०१८ ते २०२६ दरम्यान तब्बल ७ प्रमुख परीक्षा वादाच्या भोवऱ्यात
नागपूर: MPSC Exam Controversies च्या पार्श्वभूमीवर महाराष्ट्र लोकसेवा आयोगाच्या (MPSC) एकूणच कामकाजावर आणि पारदर्शकतेवर स्पर्धा परीक्षार्थींकडून गंभीर प्रश्नचिन्ह उपस्थित केले जात आहे. सरळसेवा भरतीतील विविध पदांच्या परीक्षा खासगी कंपन्यांकडून घेताना सातत्याने गैरप्रकार होत असल्याने या परीक्षांची जबाबदारी राज्य सरकारने एमपीएससीकडे सोपवण्याचा निर्णय घेतला होता. मात्र, आयोगातील अधिकाऱ्यांचे संबंध अन्न व औषध प्रशासनातील औषध निरीक्षक पदाच्या परीक्षेतील पेपर गैरप्रकाराशी जोडले गेल्याने आयोगाच्या विश्वासाहर्तेवरच मोठे प्रश्नचिन्ह निर्माण झाले आहे. २०१८ ते २०२६ या कालावधीत किमान सात प्रमुख परीक्षा या पेपरफूट, गुणांमध्ये फेरफार किंवा इतर गैरव्यवहारांच्या आरोपांमुळे तीव्र वादाच्या भोवऱ्यात सापडल्या आहेत.
खासगी यंत्रणांऐवजी एमपीएससीकडे सरळसेवा भरतीची जबाबदारी दिल्याने परीक्षा प्रक्रियेबाबत विद्यार्थ्यांमधील विश्वास वाढेल, अशी मोठी अपेक्षा व्यक्त केली जात होती. मात्र, एमपीएससीसारख्या घटनात्मक संस्थेकडे जबाबदारी देऊनही जर पेपरफुटी आणि गैरप्रकार सुरूच राहणार असतील, तर परीक्षेची विश्वासाहर्तात नक्की कुठे सुरक्षित आहे? असा संतप्त सवाल आता हजारो स्पर्धा परीक्षार्थींकडून विचारला जात आहे.
२०१८ ते २०२६ मधील प्रमुख वादग्रस्त परीक्षांचा पट:
- २०१८ (महाराष्ट्र टीईटी): तपासादरम्यान उमेदवारांच्या गुणांमध्ये फेरफार आणि मोठा गैरव्यवहार उघडकीस आला.
- २०२० (महाराष्ट्र टीईटी): ओएमआर सीट (OMR) व सॉफ्टवेअरमध्ये छेडछाड करून गुण वाढवल्याचा आरोप झाला; यात अनेक उच्चपदस्थ आणि दलालांना अटक झाली.
- २०२१ (आरोग्य विभाग गट-ड): परीक्षा होण्यापूर्वीच प्रश्नपत्रिका बाहेर आल्याचा आरोप झाला.
- २०२१ (आरोग्य विभाग गट-ड): कथित पेपरफुटीचे प्रकरण समोर आल्यानंतर संपूर्ण परीक्षा रद्द करून ती पुन्हा घेण्यात आली.
- २०२१ (म्हाडा भरती): कथित पेपरफुटीमुळे ऐनवेळी परीक्षा रद्द करून नव्याने संपूर्ण प्रक्रिया राबवावी लागली.
- २०२६ (महाराष्ट्र टीईटी परीक्षा): परीक्षेच्या पूर्वसंध्येलाच प्रश्नपत्रिका जप्त करण्यात आली; परीक्षा पुढे ढकलण्यात आली असून सध्या ‘एसआयटी’ (SIT) कडून सखोल तपास सुरू आहे.
- २०२६ (एमपीएससी औषध निरीक्षक परीक्षा): थेट एमपीएससीच्या परीक्षेमध्ये पेपरफुटीचे आरोप झाले असून चौकशीची तीव्र मागणी केली जात आहे; यावर अधिकृत निष्कर्ष अद्याप प्रलंबित आहेत.
वर्षानुवर्षे रात्रंदिवस मेहनत करून स्पर्धा परीक्षांची तयारी करणाऱ्या लाखो विद्यार्थ्यांच्या भवितव्याशी हा खेळ सुरू असल्याने, शासनाने व आयोगाने यावर त्वरित कठोर उपाययोजना करावी अशी मागणी जोर धरत आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
03:32 31-08-2026
