खेड, लांजा, चिपळूणसह महामार्गांवर कारवाई; गणेशोत्सवाच्या पार्श्वभूमीवर पोलीस प्रशासनाचा कडक इशारा
रत्नागिरी:- सार्वजनिक रस्ते, महामार्ग आणि गर्दीच्या बाजारपेठांमध्ये आपली वाहने बेशिस्तपणे उभी करून वाहतुकीस अडथळा निर्माण करणाऱ्या वाहनचालकांविरोधात रत्नागिरी जिल्हा पोलिसांनी धडक मोहीम उघडली आहे. ३० ऑगस्ट रोजी जिल्ह्यातील विविध पोलीस ठाण्यांच्या हद्दीत केलेल्या कारवाईत तब्बल ३९ स्वतंत्र गुन्हे दाखल करण्यात आले आहेत. आगामी गणेशोत्सवाच्या पार्श्वभूमीवर कोकणात वाहनांची मोठी वर्दळ सुरू होत असल्याने वाहतुकीची शिस्त बिघडवणाऱ्यांवर पोलिसांनी कारवाईचा बडगा उगारला आहे.
तालुकानिहाय पोलिसांची मुख्य कारवाई:
- खेड व भरणे नाका: भरणे येथे सुझुकी ब्रिझा कार उभी करणाऱ्या सुभाष धाकणे, रस्त्याच्या मध्यभागी ट्रक उभा करणाऱ्या प्रकाश मोरे आणि भरणे पुलाजवळ ट्रक उभा करणाऱ्या अब्दुल रखांगे यांच्यावर गुन्हे दाखल झाले. वेऱळ फाटा व लेन परिसरातही वाहनांवर कारवाई करण्यात आली.
- लांजा व संगमेश्वर: लांजा बाजारपेठेत महामार्गावर टाटा ट्रक, ॲपे गुड्स कॅरियर आणि अशोक लेलँड वाहने उभी करून वाहतूक कोंडी करणाऱ्या सचिन भोंगळे, भारत कांबळे, अविनाश भामरे, अविनाश कुंभार व मोबीन मोटलानी यांच्यावर गुन्हे दाखल करण्यात आले. संगमेश्वर व देवरूख परिसरात संदीप सकटे, संदेश साबळे आणि शैलेश दाभाडे यांच्यावर कारवाई झाली.
- चिपळूण, अलोरे व गुहागर: चिपळूण एसटी स्थानकामागे बस उभी करणाऱ्या ऋतुराज चव्हाणवर गुन्हा नोंदवण्यात आला. पेडांबे ब्रिज परिसरात मलिक मुल्ला, अलू मुल्लेमनी आणि अमोल दनदुरे यांच्यावर, तर शृंगारतळीत जीप उभी करणाऱ्या दीपक काताळकर व शक्ती सावंत यांच्यावर कारवाई झाली.
- राजापूर व दाभोळ-नाटे क्षेत्र: राजापूर शहरातील जवाहर चौक ते गणेशघाट मार्गावर संतोष राऊत, तुळशिदास जाधव व रमेश कदम यांच्यावर गुन्हे दाखल झाले. दाभोळ-चिखलगाव मार्गावर जेसीबी उभा करणाऱ्या चंदू राठोडवर, तर पावस स्टँडजवळ फुलराम चौधरी व शिवकुमार मुल्लेमनी यांच्यावर सागरी पोलिसांनी कारवाई केली.
निष्काळजीपणे वाहन चालवणाऱ्यांवरही गुन्हे
केवळ वाहने उभी करण्यावरच नव्हे, तर रस्त्याच्या परिस्थितीकडे दुर्लक्ष करून निष्काळजीपणे वाहने चालवणाऱ्यांवरही गुन्हे नोंदवले गेले. मुंबई-गोवा महामार्गावर कोदवली वळणावर कंटेनरचे चाक साईडपट्टीवरून खाली उतरवल्याप्रकरणी सर्वजीत यादववर, तर जयगड मार्गावर बलकर ट्रक निष्काळजीपणे चालवल्याप्रकरणी राजू फड यांच्यावर भारतीय न्याय संहितेचे कलम २८१ आणि मोटार वाहन कायद्यान्वये गुन्हे दाखल करण्यात आले आहेत.
पोलिसांनी भारतीय न्याय संहिता २०२३ मधील कलम २८५, २८१, २२३ आणि मोटार वाहन कायद्यातील विविध कलमांनुसार या सर्व कारवाया केल्या आहेत. सण-उत्सवाच्या काळात महामार्गांवर मनमानी पद्धतीने वाहने उभी करून पादचारी व इतर वाहनधारकांना धोका निर्माण करणाऱ्यांविरुद्ध ही मोहीम यापुढेही अधिक तीव्र केली जाईल, असा स्पष्ट इशारा पोलीस प्रशासनाने दिला आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
17:05 01-09-2026
