मतदार यादी पुनरीक्षण, महसूल आणि विकासकामांचा घेणार आढावा; राजकीय पक्ष व लोकप्रतिनिधींसोबत होणार बैठक
रत्नागिरी:- कोकण विभागाच्या विभागीय आयुक्त तथा मतदार यादी निरीक्षक रूबल अगरवाल या २ आणि ३ सप्टेंबर रोजी रत्नागिरी जिल्ह्याच्या दोन दिवसीय अधिकृत दौऱ्यावर येत आहेत. या दौऱ्यादरम्यान त्या जिल्ह्यातील विशेष संक्षिप्त पुनरीक्षण (SIR), महसूलविषयक कामकाज, मतदान केंद्रांची पाहणी आणि स्थानिक स्वराज्य संस्थांच्या कामकाजाचा सविस्तर आढावा घेणार आहेत. तसेच लोकप्रतिनिधी व विविध राजकीय पक्षांच्या पदाधिकाऱ्यांसोबत महत्त्वपूर्ण बैठक आयोजित करण्यात आली आहे.
२ सप्टेंबर: असा असेल पहिला दिवस
- चिपळूण भेट व पाहणी: बुधवारी, २ सप्टेंबर रोजी सकाळी विभागीय आयुक्त अगरवाल चिपळूण उपविभागीय अधिकारी (SDO) कार्यालयाला भेट देऊन कामाचा आढावा घेतील. त्यानंतर त्या प्रत्यक्ष मतदान केंद्रे, स्थानिक नगरपालिका आणि ग्रामपंचायतींना भेट देतील. दुपारी चिपळूण व रत्नागिरी विधानसभा मतदारसंघातील शाळांमधील मतदान केंद्रांची प्रत्यक्ष पाहणी करतील.
- आढावा बैठक (सायंकाळी ४ ते ५): जिल्हाधिकारी कार्यालयात एसआयआर (SIR) व महसूल विषयांबाबत जिल्ह्यातील सर्व वरिष्ठ अधिकाऱ्यांची महत्त्वपूर्ण आढावा बैठक पार पडेल.
- लोकप्रतिनिधींसोबत बैठक (सायंकाळी ५ ते ६): जिल्हाधिकारी कार्यालयातच लोकप्रतिनिधी आणि विविध राजकीय पक्षांच्या प्रतिनिधींसोबत बैठक आयोजित करण्यात आली असून, यामध्ये मतदार याद्या व इतर प्रशासकीय मुद्द्यांवर चर्चा होईल.
३ सप्टेंबर: राजापूर पाहणी अन् सिंधुदुर्ग प्रयाण
गुरुवारी, ३ सप्टेंबर रोजी सकाळी विभागीय आयुक्त राजापूर नगरपालिका तसेच परिसरातील स्थानिक मतदान केंद्रांची प्रत्यक्ष पाहणी करतील. यानंतर पुढील दौऱ्यासाठी त्या सिंधुदुर्ग जिल्ह्यातील कणकवलीकडे रवाना होणार आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:23 01-09-2026
