नाव तपासणी व दुरुस्तीसाठी ३० सप्टेंबरपर्यंत मुदत
रत्नागिरी:- भारत निवडणूक आयोगाच्या विशेष सखोल पुनरीक्षण कार्यक्रमांतर्गत (SIR) रत्नागिरी जिल्ह्यातील पाचही विधानसभा मतदारसंघांची प्रारूप मतदार यादी सोमवार, ३१ ऑगस्ट रोजी प्रसिद्ध करण्यात आली. या प्रक्रियेत रत्नागिरी जिल्ह्यातील तब्बल १ लाख ३१ हजार ५९६ मतदारांची नावे वगळण्यात आली असल्याने मोठा खळबळ उडाली आहे. १ ऑक्टोबर २०२६ या अर्हता दिनांकावर आधारित ही यादी जाहीर करण्यात आली असून, मतदारांना ३० सप्टेंबर २०२६ पर्यंत आपले दावे व हरकती नोंदवता येणार आहेत. यानंतर ४ नोव्हेंबर २०२६ रोजी अंतिम मतदार यादी प्रसिद्ध केली जाईल, अशी माहिती उपजिल्हा निवडणूक अधिकारी राहुल गायकवाड यांनी दिली.
मोठ्या प्रमाणावर नावे वगळण्यामागील कारणे
जिल्ह्यातून एवढ्या मोठ्या संख्येने नावे वगळली गेल्याने नागरिकांचे लक्ष या कारणांकडे लागले आहे. प्रामुख्याने मृत मतदार, कायमस्वरूपी स्थलांतरित झालेले मतदार, दुबार नोंदणी असलेले मतदार किंवा तार्किक विसंगती आढळल्यामुळे ही नावे वगळण्यात आल्याची शक्यता आहे. प्रारूप यादी प्रसिद्ध झाल्याने नागरिकांना आपले नाव आहे की नाही हे तपासून योग्य ती कारवाई करण्याची संधी मिळणार आहे.
यादी कुठे पाहावी आणि दावे कसे नोंदवावेत?
प्रारूप मतदार यादी जिल्हाधिकारी कार्यालय, उपविभागीय अधिकारी कार्यालये, तहसील कार्यालये तसेच सर्व मतदान केंद्रांवर उपलब्ध आहे. मतदारांना ऑनलाईन पद्धतीनेही आपली नावे तपासता येतील.
- नमुना क्र. ६: नवीन नाव समाविष्ट करण्यासाठी.
- नमुना क्र. ७: नावावर आक्षेप घेण्यासाठी किंवा नाव वगळण्यासाठी.
- नमुना क्र. ८: नोंदीतील दुरुस्ती, पत्ता बदल किंवा दिव्यांगांच्या नोंदीसाठी.
राज्यात २ कोटींहून अधिक नावे वगळली; मतदान केंद्रांचे सुसूत्रीकरण
एसआयआर कार्यक्रमांतर्गत राज्यातील सर्व २८८ मतदारसंघांमध्ये जुन्या मतदार यादीतील २ कोटी ६ लाख ८८ हजार ४८७ (२१.१४ टक्के) मतदारांची नावे वगळण्यात आली आहेत. यात सुमारे १७ लाख दुबार मतदारांचा समावेश आहे. तसेच मतदान केंद्रांच्या सुसूत्रीकरणामुळे राज्यातील केंद्रांची संख्या आता १ लाख २१६ झाली आहे. ज्या मतदारांची २००२-२००४ च्या यादीशी जुळवणी झालेली नाही, त्यांना नोटिसा बजावून कागदपत्र पडताळणीनंतर अंतिम निर्णय घेतला जाणार आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
13:51 01-09-2026
