१ सप्टेंबरपासून नॅशनल कॉमन मोबिलिटी कार्ड सक्तीचे केल्याने आगारांमध्ये गोंधळ; प्रवाशांचे हाल; प्रशासनाकडून तात्पुरता दिलासा जाहीर
NCMC Card MSRTC Confusion Maharashtra: महाराष्ट्र राज्य मार्ग परिवहन महामंडळाने (MSRTC) १ सप्टेंबरपासून नॅशनल कॉमन मोबिलिटी कार्ड (NCMC Card) अनिवार्य केल्यानंतर राज्यभरातील एसटी बस स्थानकांवर आणि आगारांमध्ये मोठा गोंधळ उडाला आहे. नवीन व्यवस्था लागू होताच सर्व्हरवरील ताण, नेटवर्कच्या अडचणी आणि कार्ड वेळेत न मिळाल्यामुळे महिला, ६५ ते ७५ वयोगटातील ज्येष्ठ नागरिक आणि अमृत ज्येष्ठ नागरिकांना सवलतीच्या तिकिटाऐवजी पूर्ण भाडे मोजावे लागले. त्यामुळे प्रवाशांमधून तीव्र संताप व्यक्त केला जात आहे.
पहिल्याच दिवसापासून अनेक एसटी आगारांमध्ये इंटरनेट आणि सर्व्हरच्या समस्येमुळे तिकीट खिडक्यांवर लांबच लांब रांगा लागल्या होत्या. तसेच कार्ड रिचार्ज नेमके कुठे करावे, यावरूनही प्रवाशांमध्ये मोठा भ्रम निर्माण झाला. एजंटकडे रिचार्ज सुविधा उपलब्ध असल्याचे सांगण्यात आले, तर एजंटांनी ही सुविधा एसटीच्या वाहकांकडे असल्याचे सांगितल्याने प्रवाशांची धावपळ झाली. महामंडळाच्या माहितीनुसार, आतापर्यंत सुमारे १.११ कोटी प्रवाशांनी एनसीएमसी कार्डसाठी नोंदणी केली आहे; मात्र अनेक प्रवाशांना अद्याप प्रत्यक्ष कार्ड मिळालेले नाही.
या सर्व तांत्रिक अडचणी, प्रवाशांचे हाल आणि होणारा विरोध लक्षात घेऊन अखेर एसटी महामंडळाने प्रवाशांसाठी तातडीने तात्पुरती सूट जाहीर केली आहे.
एसटी महामंडळाने दिलेला दिलासा:
ऑनलाइन आरक्षण: ज्या महिला व ज्येष्ठ नागरिकांनी ऑनलाइन आरक्षण केले आहे, त्यांना एनसीएमसी कार्ड नसले तरी आरक्षित तिकिटावर सवलतीचा प्रवास करता येईल.
नोंदणी पावती ग्राह्य: एनसीएमसी कार्डसाठी नोंदणी केली आहे पण कार्ड मिळालेले नाही, अशा प्रवाशांना नोंदणीची पावती दाखवून ३० सप्टेंबरपर्यंत सवलतीचे तिकीट दिले जाईल.
‘एसटी संगे तीर्थाटन’ योजना: या योजनेअंतर्गत प्रवास करणाऱ्या नागरिकांसाठी १२ सप्टेंबरपर्यंत जुनी सवलत पद्धत कायम ठेवण्यात आली आहे.
गट आरक्षण (Group Booking): गणेशोत्सवाच्या काळात केलेल्या गट आरक्षणासाठी एनसीएमसी कार्डची सक्ती असणार नाही.
कागदी तिकीट वैध: सर्व्हर डाऊन व तांत्रिक अडचणींमुळे १४ सप्टेंबरपर्यंत कागदी स्वरूपातील सवलतीची तिकिटे वैध राहणार आहेत.
सक्रिय कार्डधारक: ज्या प्रवाशांकडे आधीच सक्रिय एनसीएमसी कार्ड आहे, त्यांना कार्डद्वारेच सवलतीचे तिकीट दिले जाईल.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:53 04-09-2026
