राजकीय वर्तुळात खळबळ; सुजाण नागरिक, हिंदू-मुस्लिमांनी सतर्क राहण्याचे आवाहन
मुंबई : आगामी गणेशोत्सवाच्या काळात देशात आणि महाराष्ट्रात जातीय दंगली घडवण्याचा मोठा डाव रचला जात असल्याचा खळबळजनक दावा महाराष्ट्र नवनिर्माण सेनेचे अध्यक्ष राज ठाकरे यांनी केला आहे. मूळ सामाजिक व आर्थिक प्रश्नांवरून जनतेचे लक्ष विचलित करण्यासाठी ही यंत्रणा राबवली जात असून, नागरिकांनी या आमिषाला बळी न पडता सतर्क राहावे, असे आवाहन त्यांनी केले. ठाण्यातील राम गणेश गडकरी रंगायतन नाट्यगृहात आयोजित मनसेच्या राज्यस्तरीय पदाधिकारी मेळाव्यात ते बोलत होते.
Raj Thackeray Controversy Statement आणि गणेशोत्सवातील भीती
मेळाव्यात बोलताना राज ठाकरे म्हणाले, “१४ तारखेला गणपतीचे आगमन होत आहे. मला सर्वाधिक भीती आहे की, या काळात मुंबई आणि महाराष्ट्रासह संपूर्ण देशात दंगली घडवल्या जातील. लोकांचे मूळ परिस्थितीकडे दुर्लक्ष व्हावे, हाच यामागचा उद्देश आहे. नुकतीच मुंबईत याची एक छोटी झलक पाहायला मिळाली असून ही तर केवळ सुरुवात आहे. त्यामुळे सुजाण हिंदू आणि सुजाण मुस्लिम या दोघांनीही अत्यंत सतर्क राहिले पाहिजे. आपल्या किंवा त्यांच्या नावाने कोणीतरी दंगली घडवून आणेल, ज्यामध्ये हकनाक निष्पाप मुलांचे बळी जातील.”
पुण्यातील डीजे वादावर आणि महागाईवर सरकारला घेरले
पुण्यात सध्या सुरू असलेल्या डीजे आणि डॉल्बीच्या वादावर भाष्य करताना राज ठाकरे यांनी थेट मुख्यमंत्र्यांच्या भूमिकेवर प्रश्नचिन्ह उपस्थित केले. “कायद्याने डीजेवर बंदी आणता येत नाही, असे सांगणाऱ्या मुख्यमंत्र्यांच्या नागपुरात डीजे कसा बंद झाला? लोकांना सतत अशा किरकोळ वादात गुंतवून ठेवले जात आहे, जेणेकरून तरुणांना शिक्षण, नोकऱ्या आणि आरोग्य व्यवस्था यांसारख्या गंभीर समस्यांचा विसर पडेल. बेरोजगारी आणि महागाईवरून जनतेचे लक्ष उडवण्यासाठीच धर्माची गुंगी दिली जात आहे,” असा घणाघाती आरोपही त्यांनी यावेळी केला.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:27 07-09-2026
