आंबा प्रतवारी, व्हेपर हीट ट्रीटमेंट व इरॅडिएशन प्रक्रियेची केली पाहणी; शेतकऱ्यांना ‘मँगोनेट’ नोंदणीसाठी प्रवृत्त करणार
नवी मुंबई / रत्नागिरी : रत्नागिरी जिल्ह्यातील आंबा उत्पादक शेतकऱ्यांना जागतिक बाजारपेठ उपलब्ध करून देण्याच्या उद्देशाने आणि आधुनिक आंबा निर्यात प्रक्रियेची माहिती घेण्यासाठी जिल्ह्यातील प्रमुख पदाधिकाऱ्यांच्या शिष्टमंडळाने नवी मुंबईतील वाशी कृषी उत्पन्न बाजार समिती (APMC) अंतर्गत असलेल्या अत्याधुनिक आंबा निर्यात केंद्राला सदिच्छा भेट दिली. या पाहणी दौऱ्यात पदाधिकाऱ्यांनी आंबा निर्यातीच्या सर्व तांत्रिक टप्प्यांची सविस्तर माहिती घेत संबंधित तज्ज्ञ व अधिकाऱ्यांशी चर्चा केली.
जिल्ह्यातील प्रमुख लोकप्रतिनिधींची उपस्थिती
या अभ्यास दौऱ्यामध्ये जिल्हा परिषद कृषी सभापती महेश नाटेकर यांच्यासह रत्नागिरी पंचायत समिती सभापती प्रवीण पांचाळ, राजापूर पंचायत समिती सभापती नंदिनी कदम, संगमेश्वर पंचायत समिती सभापती शर्वरी वेल्हे, चिपळूण पंचायत समिती सभापती सूर्यकांत खेतले, गुहागर पंचायत समिती सभापती प्रणव पोळेकर, दापोली कृषी सभापती उन्मेश राजे, जिल्हा परिषद सदस्य प्रमोद निवळकर, कृषी विभागाचे अधिकारी अभिजित गडदे आणि जिल्ह्यातील शेतकरी प्रतिनिधी मोठ्या संख्येने उपस्थित होते.
आधुनिक तंत्रज्ञान व निर्यात प्रक्रियेची प्रत्यक्ष पाहणी
शिष्टमंडळाने निर्यात केंद्रात आंब्याची शास्त्रोक्त प्रतवारी (Grading), स्वच्छता, आधुनिक पॅकेजिंग आणि साठवणूक यंत्रणेची पाहणी केली. परदेशात आंबा पाठवण्यासाठी अत्यंत महत्त्वाच्या मानल्या जाणाऱ्या ‘व्हेपर हीट ट्रीटमेंट’ (VHT) आणि ‘इरॅडिएशन’ (Irradiation) प्रक्रियेची तांत्रिक माहिती केंद्राच्या तज्ज्ञांकडून घेतली. निर्यात केंद्राचे व्यवस्थापक अनिमेश पाटील व त्यांच्या पथकासोबत झालेल्या बैठकीत युरोप व आखाती देशांमधील आंब्याची मागणी, निर्यातीचे निकष आणि बागायतदारांसमोरील अडचणी यावर सविस्तर मंथन झाले.
‘मँगोनेट’ नोंदणी वाढवून शेतकऱ्यांचे उत्पन्न वाढवणार : कृषी सभापती महेश नाटेकर
वाशी निर्यात केंद्राची कार्यप्रणाली अत्यंत अद्ययावत असून याचा थेट फायदा जिल्ह्यातील शेतकऱ्यांना करून दिला जाईल, असा विश्वास कृषी सभापती महेश नाटेकर यांनी व्यक्त केला. जिल्ह्यातील जास्तीत जास्त बागायतदारांना ‘मँगोनेट’ (MangoNet) प्रणालीवर नोंदणी करण्यासाठी विशेष मार्गदर्शन शिबिरे घेतली जातील. शेतकऱ्यांनी थेट निर्यातक्षम हापूस उत्पादनावर भर दिल्यास त्यांच्या उत्पन्नात मोठी वाढ होईल, असा विश्वास व्यक्त करत आगामी हंगामात निर्यात वाढवण्यासाठी ठोस नियोजन करण्यात येत असल्याचे त्यांनी सांगितले.
