रत्नागिरी तालुक्यात सर्वाधिक २४ त्रुटी प्रलंबित; मंडणगड तालुक्याची १०० टक्के कामगिरी करत बाजी
रत्नागिरी जिल्ह्यात केंद्र व राज्य सरकारच्या महत्त्वाकांक्षी ‘जलजीवन मिशन’ अंतर्गत सुरू असलेल्या नळ पाणीपुरवठा योजनांच्या कामांमध्ये मोठ्या प्रमाणावर अनियमितता आणि तांत्रिक त्रुटी आढळल्याचे उघडकीस आले आहे. जिल्हा परिषदेच्या विशेष तपासणी पथकाने जिल्ह्यात २ हजार ११ वेळा केलेल्या प्रत्यक्ष पाहणीत तब्बल ९४६ गंभीर आक्षेप नोंदवले आहेत. यातील अनेक कामांच्या दिरंगाईबद्दल जिल्हा परिषदेच्या पदाधिकाऱ्यांनी तीव्र नाराजी व्यक्त केली आहे.
एकूण १,४२८ योजनांची अंमलबजावणी
रत्नागिरी जिल्ह्यात सध्या जलजीवन मिशनअंतर्गत १ हजार ४२८ नळ पाणीपुरवठा योजनांची अंमलबजावणी सुरू आहे. जिल्हा परिषदेच्या पथकाने केलेल्या सखोल तपासणीदरम्यान कामाचा निकृष्ट दर्जा, अपूर्ण कागदपत्रे, तांत्रिक चुका आणि निकषांचे उल्लंघन अशा एकूण ९ वेगवेगळ्या प्रकारच्या गंभीर त्रुटी आढळल्या आहेत. प्रशासनाने तातडीने पावले उचलत ९४६ पैकी ८८४ आक्षेप निकाली काढले असले, तरी अजूनही ७२ आक्षेपांची पूर्तता प्रलंबित आहे.
रत्नागिरी तालुक्यात सर्वाधिक त्रुटी
तपासणी अहवालानुसार, रत्नागिरी तालुक्यातील चित्र अत्यंत चिंताजनक आहे. रत्नागिरी तालुक्यात १८२ योजनांच्या पाहणीत तब्बल १४९ त्रुटी आढळल्या होत्या. यापैकी २४ आक्षेप अजूनही प्रलंबित असून, प्रलंबित आक्षेपांची ही संख्या संपूर्ण जिल्ह्यात सर्वाधिक आहे. कंत्राटदार आणि अधिकाऱ्यांच्या ढिम्म कारभारामुळे येथील योजनांचे काम रखडले आहे.
मंडणगड तालुक्याचा आदर्श
एकीकडे रत्नागिरी तालुक्यात निष्काळजीपणा समोर आला असताना, दुसरीकडे मंडणगड तालुक्याने मात्र उत्कृष्ट कामगिरी करत आदर्श निर्माण केला आहे. मंडणगड तालुक्यात १०४ योजनांच्या तपासणीदरम्यान ७६ आक्षेप नोंदवण्यात आले होते. तालुका प्रशासनाने या सर्व ७६ आक्षेपांची १०० टक्के पूर्तता करून सर्व त्रुटींचे वेळेत निवारण केले आहे.
प्रलंबित ७२ आक्षेपांची लवकरात लवकर पूर्तता करून दोषींवर कडक कारवाई करण्याची मागणी आता जिल्हा परिषद सदस्यांकडून केली जात आहे.
