भातपिक आणि आंबा-काजू बागायतदारांना काळजी घेण्याचे आवाहन
रत्नागिरी : रत्नागिरी जिल्ह्यात पुढील पाच दिवसांत म्हणजेच २० सप्टेंबरपर्यंत हलक्या ते मध्यम स्वरूपाच्या पावसाची शक्यता वर्तवण्यात आली आहे. भारत हवामान विभाग (IMD) आणि डॉ. बाळासाहेब सावंत कोकण कृषी विद्यापीठ, दापोली यांच्या ग्रामीण कृषी मौसम सेवाकेंद्रातर्फे हा अंदाज व्यक्त करण्यात आला आहे. या काळात हवामान मुख्यतः ढगाळ राहून कमाल तापमान ३० ते ३२ अंश सेल्सिअस, तर किमान तापमान २४ ते २५ अंश सेल्सिअसदरम्यान राहण्याची शक्यता आहे. तसेच ताशी १० ते १५ किमी वेगाने वारे वाहतील, अशी माहिती देण्यात आली आहे.
जिल्ह्यात गणेश चतुर्थीच्या मुहूर्तावर सलग दोन दिवस तुरळक ठिकाणी पावसाने हजेरी लावली होती. त्यानंतर सोमवारी (१४ सप्टेंबर) रात्रीही काही भागांत जोरदार सरी कोसळल्या; मात्र त्यानंतर पावसाने पुन्हा विश्रांती घेतली. मंगळवारी दिवसभर जिल्ह्यात कधी कडकडीत ऊन तर कधी ढगाळ वातावरण अशी संमिश्र स्थिती पाहायला मिळाली.
कृषी विद्यापीठाकडून शेतकऱ्यांना महत्त्वाचा सल्ला
पावसाचा हा अंदाज आणि ढगाळ वातावरण लक्षात घेता कृषी विद्यापीठाच्या तज्ज्ञांनी जिल्ह्यातील शेतकरी व बागायतदारांसाठी तातडीच्या कृषी सूचना जारी केल्या आहेत:
भातशेतीची निगा: भातपिकामध्ये सध्या तुडतुडे, खोडकीड आणि पाने गुंडाळणाऱ्या किडीचा प्रादुर्भाव वाढण्याची शक्यता आहे. यासाठी शेतकऱ्यांनी शेताची नियमित पाहणी करून आवश्यकतेनुसार योग्य कीटकनाशकांची फवारणी करावी.
आंबा व काजू कलमांचे संरक्षण: आंबा आणि काजूच्या नवीन लावलेल्या कलमांना सोसाट्याच्या वाऱ्यापासून संरक्षण मिळावे म्हणून भक्कम काठीचा आधार द्यावा.
पाण्याचा निचरा व कीड नियंत्रण: झाडांच्या मुळाशी पाणी साचून राहणार नाही याची दक्षता घ्यावी. तसेच नवीन पालवीवर येणाऱ्या किडींवर वेळेत नियंत्रण मिळवावे.
फवारणी व खत व्यवस्थापन: स्थानिक हवामानाची स्थिती आणि पावसाचा अंदाज पाहूनच शेतात खते देणे व फवारणीची कामे हाती घ्यावीत, असे आवाहन कृषी विद्यापीठाने केले आहे.
