तब्बल ४० टक्के भाजलेल्या संतोष फुटक यांची प्रकृती पुन्हा बिघडली; जिल्हा शासकीय रुग्णालयात उपचारादरम्यान घेतला अखेरचा श्वास
Ratnagiri Boating Fire Accident प्रकरणात एका खलाश्याचा दुर्दैवी मृत्यू झाल्याची घटना समोर आली आहे. रत्नागिरी तालुक्यातील चांदोर-तळेवाडी येथील रहिवासी असलेले संतोष कृष्णा फुटक (वय ४०) हे बोटीवर जेवण बनवत असताना अचानक गॅसचा भडका उडून गंभीररीत्या भाजले होते. त्यांच्यावर रत्नागिरीतील जिल्हा शासकीय रुग्णालयात उपचार सुरू असताना मंगळवारी (२२ सप्टेंबर) सकाळी १० वाजता त्यांचा मृत्यू झाला.
मिळालेल्या माहितीनुसार, ही घटना शनिवारी, ५ सप्टेंबर रोजी सकाळी बोटीवर घडली होती. संतोष फुटक हे नेहमीप्रमाणे बोटीवर जेवण बनवण्याचे काम करत असताना अचानक गॅसचा भडका उडाला. या अपघातात ते सुमारे ४० टक्के भाजले होते. दुर्घटनेनंतर तात्काळ त्यांना उपचारासाठी जिल्हा शासकीय रुग्णालयात दाखल करण्यात आले होते.
प्राथमिक उपचार पूर्ण झाल्यानंतर त्यांना रुग्णालयातून डिस्चार्ज देण्यात आला होता आणि ते घरी परतले होते. मात्र, घरी गेल्यानंतर त्यांची प्रकृती पुन्हा अचानक खालावली. प्रकृती ढासळल्याने नातेवाईकांनी त्यांना पुन्हा उपचारासाठी तातडीने जिल्हा रुग्णालयात दाखल केले.
रुग्णालयात दाखल केल्यानंतर उपचार सुरू असतानाच मंगळवारी सकाळी १० वाजण्याच्या सुमारास वैद्यकीय अधिकाऱ्यांनी त्यांना तपासून मृत घोषित केले. या घटनेमुळे चांदोर-तळेवाडी परिसरात हळहळ व्यक्त होत आहे. घटनेबाबत रुग्णालयाच्या पोलीस चौकीत रीतसर नोंद करण्यात आली असून पोलीस पुढील तपास करत आहेत.
