जिल्हा नियोजन समितीत आक्रमक भूमिका; प्रत्यक्ष पंचनामे करून भरपाई देण्याची मागणी
चिपळूण: Bhaskar Jadhav Drought Demand Ratnagiri अंतर्गत रत्नागिरी जिल्ह्यात यंदा पावसाचे प्रमाण अत्यंत कमी व अनियमित राहिल्याने भात आणि नाचणी पिकांचे मोठ्या प्रमाणात नुकसान झाले आहे. असे असतानाही जिल्ह्यातील केवळ तीन तालुक्यांचा दुष्काळग्रस्त (Drought) यादीत समावेश करण्यात आल्याने शिवसेना नेते, आमदार भास्करराव जाधव यांनी अत्यंत आक्रमक भूमिका घेतली आहे. गुहागर, चिपळूण, खेड, दापोली, मंडणगड आणि लांजा या सहा तालुक्यांचा तातडीने दुष्काळग्रस्त तालुक्यांमध्ये समावेश करून नुकसानग्रस्त शेतकऱ्यांना न्याय नुकसानभरपाई द्यावी, अशी मागणी त्यांनी मुख्यमंत्री देवेंद्र फडणवीस यांच्याकडे पत्राद्वारे केली आहे.
Bhaskar Jadhav Drought Demand Ratnagiri: जिल्हा नियोजन समितीत मांडला ठराव
सोमवारी झालेल्या रत्नागिरी जिल्हा नियोजन समितीच्या बैठकीत आमदार भास्करराव जाधव यांनी या प्रश्नावर आक्रमकपणे आवाज उठवला. जिल्ह्यातील प्रत्यक्ष पर्जन्यमान, शेतीची दुरवस्था आणि भात-नाचणी पिकांचे झालेले अतोनात नुकसान लक्षात घेता उर्वरित नुकसानग्रस्त तालुक्यांचाही दुष्काळग्रस्त यादीत समावेश करावा, असा ठराव त्यांनी बैठकीत मांडला. त्यानंतर मुख्यमंत्र्यांना थेट पत्र पाठवून त्यांनी या मागणीचा पाठपुरावा अधिक तीव्र केला आहे.
६ तालुक्यांतील शेतकऱ्यांवर अन्याय; प्रत्यक्ष पंचनाम्यांची मागणी
राज्यातील ३५८ पैकी २६५ तालुक्यांचा दुष्काळग्रस्त यादीत समावेश करण्यात आला असताना, रत्नागिरीतील सहा तालुक्यांतील शेतकऱ्यांना मात्र मदतीपासून वंचित ठेवण्यात आले आहे. हा निर्णय प्रत्यक्ष परिस्थितीशी विसंगत असून शेतकऱ्यांवर अन्याय करणारा असल्याचे त्यांनी पत्रात नमूद केले. केवळ कागदोपत्री निकषांचा आधार न घेता या सहा तालुक्यांमध्ये पीक नुकसानीचे प्रत्यक्ष पंचनामे करावेत आणि प्रत्येक पात्र शेतकऱ्याला त्वरित आर्थिक नुकसानभरपाईसह सर्व शासकीय सवलती लागू कराव्यात, अशी ठाम भूमिका त्यांनी मांडली आहे.
जाधवांकडून शासनावर दबाव; सरकार काय निर्णय घेणार?
जिल्हा नियोजन समितीतील आक्रमक पवित्रा, मुख्यमंत्र्यांना दिलेले पत्र आणि सहा तालुक्यांसाठीचा ठाम पाठपुरावा यांमुळे आमदार भास्करराव जाधव यांनी रत्नागिरीतील शेतकऱ्यांच्या न्याय्य हक्कासाठी शासनावर मोठा दबाव निर्माण केला आहे. आता राज्य सरकार या मागणीवर काय सकारात्मक निर्णय घेते, याकडे संपूर्ण जिल्ह्यातील शेतकऱ्यांचे लक्ष लागले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
09:07 30-09-2026
