स्थानिक नागरिकाच्या दक्षतेमुळे घटना उघडकीस; शासकीय नियमांनुसार घटनास्थळीच अग्निसंस्कार
रत्नागिरी : पांचाबे येथील गायकवाडवाडीत रस्त्याच्या बाजूला एका नर बिबट्याचा मृतदेह कुजलेल्या अवस्थेत आढळून आल्याने परिसरात खळबळ उडाली आहे. २८ सप्टेंबर रोजी सायंकाळच्या सुमारास ही घटना उघडकीस आली.
Panchambe Sangameshwar Leopard Death बाबत स्थानिक नागरिकाची दक्षता
पांचाबे येथील स्थानिक नागरिक अविनाश भिकाजी टाकळे यांनी रस्त्यालगत बिबट्याचा मृतदेह पाहताच तात्काळ संगमेश्वर वन विभागाला दूरध्वनीवरून याची माहिती दिली. घटनेचे गांभीर्य ओळखून वन विभागाच्या पथकाने तातडीने घटनास्थळी धाव घेत पंचनामा केला.
९ ते १० दिवसांपूर्वी मृत्यू अन् वैद्यकीय तपासणी
प्राथमिक पाहणीनुसार या नर बिबट्याचा मृत्यू साधारण ९ ते १० दिवसांपूर्वी झाला असावा, असा अंदाज वर्तवण्यात आला आहे. प्रदीर्घ कालावधीमुळे मृतदेह पूर्णपणे सडलेल्या व कुजलेल्या अवस्थेत होता. घटनेची माहिती मिळताच कडवई येथील पशुधन विकास अधिकाऱ्यांनी घटनास्थळी दाखल होऊन मृतदेहाची वैद्यकीय तपासणी केली. हा मृत्यू नैसर्गिक कारणांमुळेच झाला असावा, असा प्राथमिक निष्कर्ष त्यांनी नोंदवला आहे.
शासकीय नियमांनुसार घटनास्थळीच अग्निसंस्कार
वैद्यकीय सोपस्कार पूर्ण झाल्यानंतर शासकीय नियमावलीनुसार घटनास्थळीच लाकडाची चिता रचून बिबट्याच्या अवयवांवर अग्निसंस्कार करण्यात आले आणि सर्व अवशेष पूर्णपणे नष्ट करण्यात आले.
याबाबतची सर्व कार्यवाही चिपळूण-रत्नागिरीच्या विभागीय वन अधिकारी गिरीजा देसाई, सहाय्यक वनसंरक्षक प्रियंका लगड आणि रत्नागिरीचे परिक्षेत्र वनाधिकारी विक्रम गुरव यांच्या मार्गदर्शनाखाली पूर्ण करण्यात आली. या मोहिमेत संगमेश्वर-देवरुखचे वनपाल सागर गोसावी, आरवलीचे वनरक्षक सूरज तेली, साखरप्याचे वनरक्षक सहयोग कराडे, फुणगूसचे वनरक्षक आकाश कडूकर, कुटगिरीच्या पोलिस पाटील तसेच प्राणीमित्र प्रणित टाकळे आणि शंकर जागुष्टे सहभागी झाले होते.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
09:07 30-09-2026
