वणौशी-खोंडारण परिसरात खळबळ; गावठी बनावटीच्या बंदुकीतून गोळी सुटून तरुणाचा दुर्दैवी अंत
दापोली (रत्नागिरी): दापोली तालुक्यातील दाभोळजवळील वणौशी-खोंडारण परिसरात ३० सप्टेंबरच्या रात्री शिकारीसाठी गेलेल्या दोघांवर काळाने भीषण घाला घातला आहे. शिकारीदरम्यान गावठी बनावटीच्या बंदुकीतून अचानक मिसफायर होऊन लागलेल्या गोळ्यांच्या छर्र्यांमुळे एकाचा जागीच मृत्यू झाला, तर दुसरा गंभीर जखमी झाला आहे. या दुर्दैवी घटनेत सचिन शांताराम शिगवण (वय ४४, रा. खोंडारण खालचीवाडी) यांचा जागीच मृत्यू झाला असून, सुनील पांध्ये (वय ४८) हे गंभीर जखमी झाले आहेत. या घटनेमुळे संपूर्ण खोंडारण आणि दाभोळ परिसरात प्रचंड खळबळ उडाली आहे.
जंगलात शिकारीदरम्यान घडली दुर्घटना
मिळालेल्या माहितीनुसार, सचिन शिगवण आणि सुनील पांध्ये हे दोघे मंगळवारी रात्रीच्या सुमारास वणौशी-खोंडारण परिसरातील जंगलात शिकारीसाठी गेले होते. शिकारीचा शोध सुरू असतानाच त्यांच्याकडील गावठी बंदुकीतून अनपेक्षितपणे गोळी सुटली. या मिसफायरमध्ये सचिन शिगवण यांच्या पोटात आणि पोटाच्या खालच्या भागात अंदाजे चार ते पाच छर्रे घुसल्याने ते जागीच रक्ताच्या थारोळ्यात कोसळले आणि त्यांचा मृत्यू झाला. याच वेळी जवळच उभे असलेले सुनील पांध्ये यांच्याही मांडीला दोन ते तीन छर्रे लागल्याने ते गंभीर जखमी झाले. घटनेचे गांभीर्य ओळखून जखमी सुनील यांना तातडीने दापोली उपजिल्हा रुग्णालयात उपचारासाठी दाखल करण्यात आले असून, त्यांच्यावर उपचार सुरू आहेत.
दाभोळ पोलिसांकडून सखोल तपास सुरू
घटनेची माहिती मिळताच दाभोळ पोलिसांनी तातडीने घटनास्थळी धाव घेऊन पंचनाम्याची कार्यवाही पूर्ण केली. पोलिसांनी घटनास्थळावरून आवश्यक पुरावे ताब्यात घेतले असून, मृतदेह शवविच्छेदनासाठी पाठवण्यात आला आहे. प्राथमिक चौकशीत ही घटना बंदुकीचा मिसफायर झाल्यामुळेच घडल्याचे समोर येत असले, तरी गोळीबार नेमका कसा झाला, शस्त्र कोणाचे होते आणि ते अधिकृत होते का, या सर्व बाबींचा पोलीस बारकाईने तपास करत आहेत.
बेकायदेशीर शिकारीचा प्रश्न पुन्हा ऐरणीवर
दरम्यान, कोकणातील ग्रामीण भागात रात्रीच्या वेळी केल्या जाणाऱ्या बेकायदेशीर शिकारी आणि त्यासाठी वापरल्या जाणाऱ्या असुरक्षित गावठी बनावटीच्या शस्त्रांचा गंभीर प्रश्न या घटनेमुळे पुन्हा एकदा ऐरणीवर आला आहे. या प्रकरणी दाभोळ पोलीस ठाण्यात नोंद करण्यात आली असून पोलीस पुढील कायदेशीर कारवाई करत आहेत.
