अहिल्यानगरमधील नेवासा येथील स्पर्धा; तिन्ही खेळाडूंनी कौशल्याच्या जोरावर उंचावला जिल्ह्याचा मान
National Wrestling Selection : अहिल्यानगर जिल्ह्यातील नेवासा येथे नुकत्याच पार पडलेल्या राज्यस्तरीय शालेय कुस्ती स्पर्धेत रत्नागिरी जिल्ह्यातील मल्लांनी आपल्या कौशल्याच्या जोरावर सुवर्णपदकांना गवसणी घालत जिल्ह्याचे नाव राज्यभरात उज्ज्वल केले आहे. या उत्कृष्ट कामगिरीच्या जोरावर रत्नागिरीच्या तिन्ही प्रतिभावान खेळाडूंची राष्ट्रीय कुस्ती स्पर्धेसाठी निवड झाली आहे.
आदर्श हायस्कूल आणि महात्मा गांधी विद्यालयाच्या मल्लांची चमक
स्पर्धेत रत्नागिरी तालुक्यातील आदर्श हायस्कूल कुरतडे या शाळेतील दोन विद्यार्थ्यांनी फ्रीस्टाईल कुस्तीमध्ये अत्यंत चमकदार कामगिरी केली. यामध्ये ५२ किलो वजन गटात सोहम खंडेराव पाटील याने, तर ५७ किलो वजन गटात समर्थ संजय कुदळे याने सुवर्णपदक पटкаवले. या दोन्ही गुणवंत मल्लांना क्रीडा शिक्षक व मार्गदर्शक मानसिंग कदम यांचे मोलाचे मार्गदर्शन लाभले. तसेच, महात्मा गांधी विद्यालय उंबरे येथील राजवीर सतीश पवार या मल्लाने ३८ किलो वजन गटात उत्कृष्ट खेळ करत सुवर्णपदकावर आपले नाव कोरले. राजवीर याला मार्गदर्शक मारुती गलांडे यांचे मार्गदर्शन मिळाले. सर्व यशस्वी खेळाडूंना रत्नागिरी जिल्हा कुस्ती असोसिएशनचे अध्यक्ष भाई विलणकर, कार्यवाह सदानंद जोशी व पदाधिकाऱ्यांनी हार्दिक शुभेच्छा दिल्या आहेत.
आधुनिक ‘कुस्ती मॅट’च्या सरावामुळे यश
रत्नागिरीचे पालकमंत्री उदय सामंत यांनी जिल्ह्यातील प्रत्येक तालुक्यात खेळाडूंच्या सरावासाठी आधुनिक ‘कुस्ती मॅट’ उपलब्ध करून दिल्या आहेत. या मॅटवरील नियमित आणि कठोर सरावामुळेच यंदाच्या राज्यस्तरीय स्पर्धेत रत्नागिरीच्या खेळाडूंना हे मोठे व ऐतिहासिक यश मिळाले असल्याची प्रतिक्रिया विजयी खेळाडू आणि त्यांच्या प्रशिक्षकांनी व्यक्त केली आहे.
जिल्हा क्रीडा अधिकाऱ्यांकडून कौतुक
राज्यस्तरावर सुवर्णपदक मिळवून राष्ट्रीय स्पर्धेसाठी पात्र ठरलेले सोहम पाटील, समर्थ कुदळे आणि राजवीर पवार या तिन्ही होतकरू खेळाडूंचे, तसेच त्यांना मार्गदर्शन करणाऱ्या शिक्षक व प्रशिक्षकांचे रत्नागिरीचे जिल्हा क्रीडा अधिकारी विजय शिंदे यांनी विशेष कौतुक केले आहे. तसेच आगामी राष्ट्रीय स्पर्धेतही रत्नागिरीचे नाव उज्वल करण्यासाठी त्यांना त्यांनी मनापासून शुभेच्छा दिल्या आहेत.
