"महाराष्ट्रात कोरोनासारख्या ‘झाडखाऊ’ व्हायरसची लागण"; कर्जतमधील प्रस्तावित प्रकल्पाविरोधात राज्यव्यापी आंदोलन उभारण्याचा सयाजी शिंदेंचा इशारा
महाराष्ट्रात सध्या कोरोनासारख्या ‘झाडखाऊ’ व्हायरसची लागण झाली आहे, अशी बोचरी टीका करत प्रसिद्ध चित्रपट अभिनेते व पर्यावरण क्षेत्रात सक्रिय काम करणारे सयाजी शिंदे यांनी सह्याद्रीच्या संरक्षणासाठी राज्यव्यापी ‘सह्याद्री वाचवा’ आंदोलनाची घोषणा केली आहे. कर्जत येथे प्रस्तावित असलेल्या प्रकल्पासाठी तब्बल ३२ हजार झाडे तोडली जाणार असल्याचा गंभीर दावा करत त्यांनी या प्रकल्पाला तीव्र विरोध दर्शवला आहे. सरकारने जोपर्यंत एकही झाड तोडले जाणार नाही, असे अधिकृतपणे जाहीर करत नाही, तोपर्यंत हे आंदोलन थांबवणार नाही, असा स्पष्ट निर्धार त्यांनी नागपूर येथे बोलताना व्यक्त केला.
कर्जतमधील प्रकल्पावर गंभीर आरोप आणि वीजनिर्मितीचा मुद्दा
कर्जतमधील प्रकल्पाच्या माध्यमातून महाराष्ट्राची फसवणूक केली जात असून, सह्याद्रीची झाडे आणि झुडपे नष्ट करण्याचा घाट घातला जात असल्याचा आरोप सयाजी शिंदे यांनी केला. आता नागरिकांनी घराबाहेर पडून या आंदोलनात सक्रिय सहभाग घ्यावा, असे आवाहन त्यांनी केले आहे. हे आंदोलन केवळ एका विशिष्ट ठिकाणापुरते मर्यादित न राहता संपूर्ण महाराष्ट्रात पसरले पाहिजे, असे ते म्हणाले. वीजनिर्मिती माणसासाठी नक्कीच महत्त्वाची व आवश्यक असली, तरी त्यासाठी ३२ हजार झाडांचा बळी का द्यायचा? असा खडा सवाल त्यांनी उपस्थित केला. विजेसाठी माणसाला विस्थापित करा, पण झाडांना धक्का लावू नका, अशी ठाम भूमिका मांडत त्यांनी पर्यावरणाच्या रक्षणाचे महत्त्व अधोरेखित केले. तसेच, या प्रकल्पामुळे महाराष्ट्राचा राज्यप्राणी असलेल्या ‘शेकरू’चे अस्तित्वही धोक्यात येऊ शकते, अशी भीती त्यांनी व्यक्त केली.
दुटप्पीपणावर ताशेरे आणि सर्वसामान्यांना साद
महाराष्ट्रातील सर्व थरातील कलावंत, वकील, डॉक्टर, खेळाडू, शेतकरी संघटना आणि बचत गटांच्या सर्व संघटनांनी या ‘सह्याद्री वाचवा’ आंदोलनात मोठ्या संख्येने सहभागी व्हावे, असे आवाहन त्यांनी केले आहे. छत्रपती शिवाजी महाराजांचे शौर्य व पराक्रम सांगायचे, त्यांच्या ऐतिहासिक गड-किल्ल्यांचे गुणगान गायचे आणि दुसरीकडे सह्याद्रीवरील हिरवीगार झाडे नष्ट करायची, हा साफ दुटप्पीपणा असल्याची टीका त्यांनी केली. वृक्षारोपणाच्या नावाखाली प्रत्येक जिल्ह्यात कागदोपत्री किती झाडे लावली गेली आणि त्यापैकी प्रत्यक्षात किती झाडे जगली, याची सविस्तर माहिती नागरिकांनी गोळा करावी, असे आवाहनही त्यांनी केले. वृक्षारोपणाच्या नावाखाली जनतेची फसवणूक करणाऱ्यांना आता उघड करण्याची वेळ आली असल्याचे सांगत त्यांनी पर्यावरण संवर्धनासाठी एक व्यापक जनआंदोलन उभारण्याचे आवाहन केले. दिवाळी साजरी करण्यापेक्षाही सह्याद्रीच्या रक्षणासाठी या आंदोलनात सहभागी होण्याला नागरिकांनी प्राधान्य दिले पाहिजे, असे मोलाचे विचार त्यांनी मांडले.
