रत्नागिरी-कोल्हापूर राष्ट्रीय महामार्गावरील हातखंबा तिठा येथे मोरीचा नैसर्गिक प्रवाह रोखल्याप्रकरणी कारवाईचा बडगा, बेकायदेशीर काम तातडीने थांबवण्याचे आदेश
रत्नागिरी – मिऱ्या-नागपूर (रत्नागिरी-कोल्हापूर) राष्ट्रीय महामार्गावरील हातखंबा तिठा येथील कांबळे वस्तीच्या परिसरात शासकीय बॉक्स मोरीच्या बोगद्यात माती टाकून पाण्याचा नैसर्गिक प्रवाह रोखल्याप्रकरणी भारतीय राष्ट्रीय महामार्ग प्राधिकरणाने (NHAI) जमीन मालक रणजीत अमित देसाई यांना नोटीस बजावली आहे. २९ ऑक्टोबर रोजी बजावलेल्या या नोटिसीत बेकायदेशीर काम तातडीने थांबवून मोरी पूर्ववत करण्याचे आदेश देण्यात आले आहेत. दरम्यान, कारवाईवेळी विना नंबरप्लेटचा जेसीबी पळवण्याचा प्रयत्न करणाऱ्या चालकाविरोधातील प्रकरण पोलिसांनी न्यायालयात पाठवले आहे.
नेमका प्रकार काय?
जमीन मालक रणजीत देसाई यांनी जेसीबीच्या साहाय्याने मोरीच्या बोगद्यात माती टाकून आपल्या खासगी जागेत जाण्यासाठी रस्ता तयार करण्याचे काम सुरू केले होते.
महामार्ग प्राधिकरणाने मोरीच्या परिसरात सुरक्षेच्या उपाययोजनेसाठी टाकलेल्या मातीचाच वापर करून मोरी बुजवण्यात आल्याचे नोटिशीत स्पष्ट करण्यात आले आहे.
स्थानिक रहिवाशांनी या प्रकाराला विरोध केल्यानंतर दिवसा काम थांबवण्यात आले होते, परंतु रात्रीच्या वेळी पुन्हा माती टाकण्यात आल्याचा गंभीर आरोप नागरिकांनी केला आहे.
या प्रकारामुळे पाण्याचा नैसर्गिक प्रवाह बाधित होऊन महामार्गाच्या पायाभूत सुविधांचे नुकसान आणि परिसरात पाणी साचण्याचा मोठा धोका निर्माण झाला आहे.
जेसीबी चालकावर कारवाई आणि प्रशासनाची पाहणी
२९ ऑक्टोबर रोजी NHAI चे प्रतिनिधी अनिल सिंग, कनिष्ठ अभियंता ललित, प्रकल्प व्यवस्थापन सल्लागार कंपनीचे प्रतिनिधी आणि ठेकेदार कंपनीचे पथक घटनास्थळी पाहणीसाठी दाखल झाले होते.
यावेळी कारवाई टाळण्यासाठी जेसीबी चालक संतोष वासुदेव राठोड याने विना नंबरप्लेटचा जेसीबी महामार्गावरून विरुद्ध दिशेने पळवण्याचा प्रयत्न केला.
हातखंबा वाहतूक मदत केंद्राच्या पोलिसांनी तात्काळ पाठलाग करून चालकाला पकडले असून, त्याच्या वाहनावर ई-चलनाची कारवाई करत मोटार वाहन कायद्यानुसार हे प्रकरण न्यायालयात पाठवण्यात आले आहे.
जिल्हाधिकारी जिंदल यांनी या प्रकरणाची गंभीर दखल घेत महसूल कर्मचाऱ्यांना घटनास्थळी पाहणीसाठी पाठवले होते आणि बेकायदेशीर कामावर कठोर कायदेशीर कारवाई करण्याचे निर्देश दिले होते.
स्थानिकांचे प्रश्न आणि मागण्या
या संपूर्ण प्रकरणात महामार्गाचे काम करणाऱ्या ‘रवी इन्फ्रा बिल्ड’ कंपनीच्या भूमिकेवरही स्थानिकांनी तीव्र प्रश्न उपस्थित केले आहेत; मोरी बुजवण्याचा प्रकार सुरू असताना कंपनीच्या गस्ती पथकाने वेळीच हस्तक्षेप का केला नाही, असा सवाल नागरिकांनी विचारला आहे.
मोरीच्या मुखाजवळ असलेला मातीचा अर्धवट ढीग पूर्णपणे हटवावा आणि स्थानिकांच्या सोयीसाठी उखडलेला बायपास रस्ता लवकरात लवकर दुरुस्त करावा, अशी मागणी रहिवाशांनी केली आहे.
NHAI चे प्रकल्प संचालक गोविंद पी. भैरव यांनी दिलेल्या या नोटिसीची प्रत माहितीसाठी जिल्हाधिकाऱ्यांनाही पाठवण्यात आली असून, मोरी बुजवून वस्तीच्या सुरक्षेला धोका निर्माण करणाऱ्या या प्रकरणाची सखोल चौकशी करून जमीन मालकासह संबंधित कंत्राटदार कंपनीवरही कठोर कारवाई करण्याची मागणी स्थानिकांकडून होत आहे.
