रत्नागिरी : कोकणातील राजकारणात घडणारी एक महत्त्वपूर्ण घटना समोर आली आहे, ज्यामुळे शिवसेना ठाकरे गटाला मोठा धक्का बसण्याची शक्यता आहे. विधानसभा निवडणुकीत महाविकास आघाडीला आलेल्या अपयशानंतर, शिवसेना ठाकरे गटाचे काही नेते आता शिवसेना शिंदे गटाकडे वळत आहेत. या पार्श्वभूमीवर, शिवसेना शिंदे गटाचे नेते तथा मंत्री उदय सामंत यांनी एक सूचक भाष्य केले आहे.
पुढच्या ८ दिवसांत मोठा पक्षप्रवेश
उदय सामंत यांनी माध्यमांशी संवाद साधताना सांगितले की, “१८ तारखेला राज्याचे मुख्यमंत्री दावोस दौऱ्यावर आहेत. मी १९ तारखेला दावोस दौऱ्यावर जाणार आहे आणि २४ तारखेला परत येणार आहे. त्यामुळे २४ तारखेपर्यंत आपण वाट पाहावी. आपल्याला अपेक्षित असलेला आणि जनतेला अपेक्षित असलेला असा शिवसेना ठाकरे गटातून पुढच्या ८ दिवसांत शिंदे गटात मोठा पक्षप्रवेश होणार आहे.”
भास्कर जाधव यांच्या विधानाचा परिणाम
काही दिवसांपूर्वी, शिवसेना ठाकरे गटाचे नेते भास्कर जाधव यांनी एक विवादास्पद विधान केले होते, ज्यामध्ये त्यांनी शिवसेना ठाकरे गटाची जवळजवळ काँग्रेस झाली आहे असे म्हटले होते. या विधानानंतर राजकीय वर्तुळात मोठी चर्चा रंगली. उदय सामंत यांनी या विधानाचा संदर्भ देताना म्हटले, “भास्कर जाधव असं म्हणाले होते की, शिवसेना ठाकरे गटाची काँग्रेस झाली. त्यांच्या या विधानाची क्लिप व्हायरल झाल्यानंतर मी असं म्हटलं की, शिवसेना ठाकरे गटाची ३ वर्षांपूर्वीच काँग्रेस झाली. त्यामुळेच आम्ही एकनाथ शिंदे यांच्या नेतृत्वाखाली उठाव केला. त्यामुळे आम्ही खऱ्या अर्थाने बाळासाहेब ठाकरे यांच्या विचाराचा वारसा जपत आहोत.”
रत्नागिरी जिल्ह्याच्या संदर्भात उदय सामंत म्हणाले, “रत्नागिरी जिल्ह्याचं सांगायचं झालं तर ठाकरे गटाची काँग्रेस जशी झाली आहे, तशी संघटनात्मक काँग्रेस रत्नागिरीत झालेली दिसेल.” त्यांनी पुढे असंही म्हटलं की, “जर एकनाथ शिंदेंच्या नेतृत्वाखाली भास्कर जाधव यांचं मार्गदर्शन आम्हाला मिळालं तर आमच्यासाठी फायद्याचं असेल.”
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
16:00 17-01-2025
