रत्नागिरी Ratnagiri, Ganeshotsav: गौरी-गणपती विसर्जनानंतर आता कोकणातील गणेशभक्तांच्या परतीच्या प्रवासाला सुरुवात झाली आहे. कोकण रेल्वेच्या सगळ्या गाड्या हाऊसफुल्ल झाल्या आहेत. मुंबई, पुणे आणि इतर मोठ्या शहरांमध्ये परतणाऱ्या चाकरमान्यांनी रेल्वे स्थानकांवर मोठी गर्दी केली आहे.
या वर्षी कोकणात गणेशोत्सवासाठी आलेल्या भाविकांची संख्या मोठी होती आणि आता परतीच्या प्रवासासाठी रेल्वेच्या तिकिटांची मागणी प्रचंड वाढली आहे. त्यामुळे, नियमित गाड्यांसोबतच सुरू करण्यात आलेल्या गणपती स्पेशल रेल्वे गाड्यांनाही आजपासून मोठी गर्दी पाहायला मिळत आहे. मध्य रेल्वेने गणेशोत्सवासाठी कोकणात जाण्यासाठी आणि परत येण्यासाठी एकूण ३५० हून अधिक विशेष रेल्वे फेऱ्यांची सोय केली होती.
गेले सात दिवस कोकणवासीयांनी मनोभावे गणपती बाप्पाची सेवा केली. गौरी-गणपतीचे विसर्जन शांततेत पार पडल्यानंतर आता अनंत चतुर्दशीसाठी काही भाविक कोकणात थांबले आहेत, तर बहुतांश चाकरमानी आपल्या कामाच्या ठिकाणी परतण्यासाठी निघाले आहेत. या परतीच्या गर्दीचे नियोजन करण्यासाठी रेल्वे प्रशासनाकडून अतिरिक्त व्यवस्था करण्यात आली आहे.
कोकण रेल्वे मार्गावरील सर्व स्थानकांवर प्रवाशांची मोठी गर्दी लक्षात घेऊन आवश्यक सुविधा पुरवल्या जात आहेत. गणपती बाप्पाचा निरोप घेतल्यानंतर आता पुढील वर्षी पुन्हा लवकर येण्याच्या ओढीने कोकणवासी आपल्या घराकडे परतत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:29 06-09-2025
