रत्नागिरी : राज्याचे उद्योगमंत्री आणि रत्नागिरीचे सुपुत्र, ना. डॉ. उदयजी सामंत यांनी अखिल भारतीय मराठी नाट्य परिषद, रत्नागिरी शाखेच्या अध्यक्षपदाचा राजीनामा दिला आहे. शनिवार, दिनांक १३ सप्टेंबर २०२५ रोजी हॉटेल विवेक येथे झालेल्या शाखेच्या वार्षिक सर्वसाधारण सभेत त्यांनी ही घोषणा केली. नाट्य परिषदेच्या मध्यवर्ती शाखेचे विश्वस्त असल्याकारणाने, नियमांनुसार रत्नागिरीसारख्या स्थानिक शाखेचे अध्यक्षपद भूषवणे योग्य नसल्याचे कारण देत त्यांनी पदाचा त्याग केला.
या महत्वपूर्ण सभेत, नवीन अध्यक्ष निवड होईपर्यंत अध्यक्षपदाचा तात्पुरता कार्यभार विद्यमान कार्याध्यक्ष श्री. समीर इंदुलकर यांच्याकडे सोपवण्याचा निर्णय घेण्यात आला, ज्याला सभागृहाने एकमताने मंजुरी दिली.
राजीनाम्यामागे ‘हे’ आहे कारण
सभेच्या अध्यक्षस्थानावरून बोलताना ना. उदय सामंत यांनी आपल्या राजीनाम्याची भूमिका स्पष्ट केली. ते म्हणाले, “मी अखिल भारतीय मराठी नाट्य परिषद मध्यवर्तीचा विश्वस्त आहे. त्यामुळे नाट्य परिषदेच्या मध्यवर्ती अंतर्गत कार्यरत असलेल्या एखाद्या शाखेचा अध्यक्ष म्हणून काम करणे हे नैतिकदृष्ट्या आणि नियमांनुसारही उचित वाटत नाही. त्यामुळे मी आज रत्नागिरी शाखेच्या अध्यक्षपदाचा राजीनामा देत आहे.” त्यांच्या या निर्णयाने नाट्य परिषदेच्या घटनेप्रती आणि पदाप्रती असलेली त्यांची निष्ठा दिसून आली.
समीर इंदुलकरांकडे अध्यक्षपदाचा तात्पुरता कार्यभार
आपल्या राजीनाम्याची घोषणा केल्यानंतर, उदय सामंत यांनी संस्थेच्या कामकाजात कोणताही खंड पडू नये यासाठी तात्पुरत्या स्वरूपातील व्यवस्थेची सूचना केली. त्यांनी सांगितले की, “नवीन अध्यक्षपदाची निवड होईपर्यंत रत्नागिरी शाखेच्या अध्यक्षपदाचा कार्यभार शाखेचे विद्यमान आणि अनुभवी कार्याध्यक्ष श्री. समीर इंदुलकर यांचेकडे सुपूर्द करावा.” त्यांच्या या सूचनेला उपस्थित सर्व सभासदांनी आणि कार्यकारिणीने टाळ्यांच्या गजरात अनुमोदन दिले.
सामंतांच्या कारकिर्दीत नाट्य चळवळीला मिळाली उभारी
मंत्री उदय सामंत यांच्या अध्यक्षपदाच्या कारकिर्दीत रत्नागिरीतील नाट्य चळवळीला एक नवी दिशा आणि बळ मिळाले होते. त्यांच्या नेतृत्वाखाली अनेक नाट्यविषयक उपक्रम, कार्यशाळा आणि स्पर्धा यशस्वीपणे राबवण्यात आल्या, ज्यामुळे स्थानिक कलाकारांना एक मोठे आणि हक्काचे व्यासपीठ मिळाले. त्यांच्या राजीनाम्यामुळे अनेक नाट्यकर्मी आणि कलाकारांनी हळहळ व्यक्त केली आहे, मात्र त्यांच्या निर्णयाचा आदरही केला आहे.
या वार्षिक सर्वसाधारण सभेला नाट्य परिषदेचे कार्यवाह श्री. वामन कदम, उपाध्यक्ष श्री. श्रीकांत भाटवडेकर, खजिनदार श्री. सतीश दळी, सहकार्यवाह श्री. अमेय धोपटकर यांच्यासह रत्नागिरी शाखेची संपूर्ण कार्यकारिणी आणि परिषदेचे बहुसंख्य सभासद उपस्थित होते.
