रत्नागिरी, ता. ७ : मिरजोळे एमआयडीसी (Mirjole MIDC) येथील ‘ऑक्टेल’ कंपनीत कंत्राटी तत्त्वावर काम करणाऱ्या १५ कर्मचाऱ्यांना सेवेत कायम करण्याच्या मागणीसाठी काल (ता. ६) रात्री अचानक ‘काम बंद’ आंदोलन पुकारण्यात आले. या आंदोलनाला मिरजोळे ग्रामस्थांनीही जोरदार पाठिंबा देत कंपनीवर धडक दिली.
यामुळे कंपनीचे व्यवस्थापकीय संचालक राजीव टंडन हे कार्यालयात अडकून पडले होते. अखेर, राज्याचे उद्योगमंत्री आणि पालकमंत्री उदय सामंत (Uday Samant) यांनी या प्रकरणात मध्यस्थी केली आणि त्यांच्या एका फोनमुळे हा संपूर्ण वाद यशस्वीरित्या मिटला. व्यवस्थापनाने १५ कर्मचाऱ्यांना कायम करण्याचे आश्वासन दिल्यानंतरच हे आंदोलन मागे घेण्यात आले.
काय घडले नेमके?
एमआयडीसीतील ऑक्टेल कंपनीत दीडशेहून अधिक कर्मचारी कार्यरत आहेत. यापैकी तीन वर्षांची सेवा पूर्ण झालेल्या १५ कर्मचाऱ्यांना कायमस्वरूपी सेवेत घ्यावे, अशी मागणी कामगार युनियनमार्फत व्यवस्थापकीय संचालक राजीव टंडन यांच्याकडे वारंवार करण्यात येत होती. मात्र, व्यवस्थापनाकडून या मागणीला दाद दिली जात नव्हती.
ग्रामस्थांसह कंपनीवर धडक
काल (ता. ६) रात्री, हे १५ कर्मचारी (ज्यापैकी बहुतांश मिरजोळे गावातील आहेत) आणि इतर कामगारांनी अचानक ‘काम बंद’ आंदोलन सुरू केले. या आंदोलनाला पाठिंबा देण्यासाठी संतप्त मिरजोळे ग्रामस्थांनीही थेट कंपनीवर धडक दिली. नेमके त्याचवेळी मालक राजीव टंडन हे कंपनीत आल्याची माहिती मिळताच, संतप्त ग्रामस्थांनी आणि कर्मचाऱ्यांनी कंपनीच्या मुख्य प्रवेशद्वारावरच ठिय्या मांडला.
“जोपर्यंत सर्व १५ कर्मचाऱ्यांना कायमस्वरूपी सेवेत घेतल्याचे लेखी पत्र मिळत नाही, तोपर्यंत येथून हटणार नाही,” अशी ठाम भूमिका आंदोलकांनी घेतली. यामुळे टंडन यांना कंपनीच्या कार्यालयातच अडकून पडावे लागले आणि परिसरात तणावाचे वातावरण निर्माण झाले.
उदय सामंतांची यशस्वी मध्यस्थी
परिस्थिती गंभीर होत असताना, काही कर्मचाऱ्यांनी या घटनेची माहिती तात्काळ शिवसेना तालुकाप्रमुख महेश ऊर्फ बाबू म्हाप यांना दिली. म्हाप यांनी क्षणाचाही विलंब न लावता पालकमंत्री उदय सामंत यांच्याशी संपर्क साधला आणि या प्रकरणात तोडगा काढण्याची विनंती केली.
उद्योगमंत्री असलेल्या उदय सामंत यांनी तातडीने व्यवस्थापकीय संचालक राजीव टंडन यांना फोन केला. “आपल्या मतदारसंघातील या मुलांना तातडीने कायमस्वरूपी सेवेत घ्या,” अशा स्पष्ट सूचना त्यांनी टंडन यांना दिल्या.
मंत्री सामंत यांच्या सूचनेनंतर व्यवस्थापनाने एक पाऊल मागे घेतले. राजीव टंडन यांनी ३१ डिसेंबरपूर्वी या सर्व १५ कर्मचाऱ्यांना कायमस्वरूपी सेवेत घेण्याचे आश्वासन दिले. मंत्र्यांच्या या एका फोनमुळे कामगारांचा मोठा प्रश्न मार्गी लागल्याने, कर्मचाऱ्यांनी आणि ग्रामस्थांनी समाधान व्यक्त करत रात्री उशिरा आंदोलन मागे घेतले.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:07 08-11-2025
