मुंबई:
उत्तर भारतातील उच्च दाबाच्या क्षेत्रामुळे मुंबईसह संपूर्ण महाराष्ट्रात उष्णतेची लाट निर्माण झाली आहे. ही स्थिती शनिवार आणि रविवारीही कायम राहणार असून, नागरिकांना उष्णतेचा मोठा सामना करावा लागत आहे. दरम्यान, हवामान बदलामुळे राज्यात काही ठिकाणी मेघगर्जनेसह पावसाची शक्यता वर्तवण्यात आली असून, यामुळे उष्णतेपासून थोडा दिलासा मिळण्याची आशा आहे.
अमरावती, वर्ध्यात ४४.४ अंशांचा पारा
शुक्रवारी नोंदवलेल्या तापमानानुसार, अमरावती आणि वर्धा येथे सर्वाधिक ४४.४ अंश सेल्सिअस तापमानाची नोंद झाली आहे. नागपूरमध्ये ४४ अंश सेल्सिअस, तर छत्रपती संभाजीनगरमध्ये ४१.६ अंश सेल्सिअस तापमान राहिले आहे. मुंबईचे तापमान ३३ ते ३४ अंशांच्या दरम्यान स्थिर असले, तरी वाढलेल्या आर्द्रतेमुळे मुंबईकरांना घामाच्या धारांनी अक्षरशः घाम फोडला आहे.
हवामान तज्ज्ञांचे काय आहे म्हणणे?
ज्येष्ठ हवामानशास्त्रज्ञ कृष्णानंद होसाळीकर यांनी दिलेल्या माहितीनुसार, पुढील तीन ते चार दिवस कमाल तापमान चढेच राहणार आहे.
- विदर्भ: ४२ अंश सेल्सिअसच्या आसपास.
- मराठवाडा: ४० अंश सेल्सिअसच्या आसपास.
- कोकण: ३६ अंश सेल्सिअसच्या आसपास.
हवामान अभ्यासक अथ्रेय शेट्टी यांच्या मते, पुढील काही दिवस कोकण पट्ट्यात आर्द्रता ६० ते ७० टक्क्यांच्या दरम्यान असेल. मुंबईसह किनारपट्टी भागात तापमान ३४-३६ अंश असेल, तर अंतर्गत कोकण आणि महामुंबईत हे तापमान ३६-३८ अंशांपर्यंत जाऊ शकते. घाटाच्या पायथ्याजवळील भागात पारा ४० अंशांपर्यंत पोहोचण्याची शक्यता आहे. मात्र, मध्य महाराष्ट्रात रविवारपासून तापमानात थोडी घट होऊन ते ३६-३८ अंशांवर स्थिरावण्याची शक्यता आहे.
राज्यात ‘या’ तारखांना पावसाचा अंदाज
वाढत्या उष्म्यात आता पावसाचीही शक्यता वर्तवण्यात आली आहे:
- मध्य महाराष्ट्र व मराठवाडा: पुण्यासह संपूर्ण मध्य महाराष्ट्र आणि मराठवाड्यात संध्याकाळच्या सुमारास हलक्या ते मध्यम स्वरूपाच्या पावसाच्या सरी पडण्याची शक्यता आहे. यात ५ ते ४० मिमी पाऊस पडू शकतो.
- कोकण व घाट विभाग: रत्नागिरी, सिंधुदुर्ग आणि दक्षिण रायगडसह संपूर्ण घाट विभागात मेघगर्जनेसाठी अनुकूल परिस्थिती निर्माण झाली आहे.
- मुंबईची स्थिती: उत्तर कोकण आणि महामुंबईत १९, २१ आणि २२ एप्रिल रोजी मेघगर्जनेसह पावसाच्या सरी कोसळण्याचा अंदाज आहे.
तुमच्या शहरातील तापमान (शुक्रवारची नोंद)
| शहर | कमाल तापमान (अंश सेल्सिअस) |
| अमरावती | ४४.४ |
| नागपूर | ४४ |
| छ. संभाजीनगर | ४१.६ |
| सातारा | ४०.८ |
| नाशिक | ३८.४ |
| कोल्हापूर | ३८.१ |
| मुंबई | ३३.१ |
टीप: उन्हाचा कडाका पाहता नागरिकांनी दुपारच्या वेळी काळजी घ्यावी आणि उष्णतेच्या लाटेपासून बचाव करण्यासाठी पुरेसे पाणी प्यावे, असे आवाहन करण्यात येत आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:53 18-04-2026
