नवी दिल्ली: आम आदमी पक्षाच्या (AAP) गोटात आज एक मोठा राजकीय भूकंप झाला आहे. पक्षाचे संस्थापक सदस्य आणि राज्यसभा खासदार राघव चड्ढा यांनी ‘आप’ची साथ सोडत भाजपमध्ये जाण्याचा निर्णय घेतला आहे. केवळ राजीनामाच नव्हे, तर पक्षातील दोन-तृतीयांश खासदारांसोबत भाजपमध्ये विलीन होणार असल्याची घोषणा करून त्यांनी राजकीय वर्तुळात खळबळ उडवून दिली आहे.
‘मूळ मूल्यांपासून पक्ष भरकटला’ – राघव चड्ढांचा आरोप राघव चड्ढा यांनी आज खासदार संदीप पाठक आणि अशोक मित्तल यांच्यासमवेत घेतलेल्या पत्रकार परिषदेत हा मोठा निर्णय जाहीर केला. यावेळी बोलताना चड्ढा म्हणाले, “ज्या पक्षासाठी मी १५ वर्षे अहोरात्र मेहनत घेतली, तो पक्ष आता आपल्या मूळ विचारांपासून आणि मूल्यांपासून पूर्णपणे दूर गेला आहे. हा पक्ष आता देशहिताऐवजी केवळ वैयक्तिक फायद्यासाठी काम करत असल्याचे मला जाणवले. त्यामुळे ‘चुकीच्या पक्षात योग्य माणूस’ राहण्यापेक्षा मी बाहेर पडणे पसंत केले आहे.”
राज्यसभेत मोठा फेरबदल; दोन-तृतीयांश खासदारांचा पाठिंबा राघव चड्ढा यांनी दावा केला आहे की, राज्यसभेतील ‘आप’च्या एकूण १० खासदारांपैकी दोन-तृतीयांशहून अधिक खासदार त्यांच्यासोबत आहेत. त्यांनी या संदर्भातील सर्व कागदपत्रे आणि स्वाक्षरी केलेले पत्र राज्यसभेच्या सभापतींकडे सादर केले आहे.
कोणाची साथ? राघव चड्ढा यांच्या या निर्णयामुळे आम आदमी पक्षाला राज्यसभेत मोठे संख्याबळ गमवावे लागणार आहे. त्यांच्यासोबत खालील खासदार भाजपमध्ये सामील होण्याच्या तयारीत असल्याचे समोर आले आहे:
- हरभजन सिंग
- संदीप पाठक
- अशोक मित्तल
- स्वाती मालीवाल
- विक्रमजीत सिंह साहनी
- राजेंद्र गुप्ता
भाजप नेतृत्वावर विश्वास पंतप्रधान नरेंद्र मोदी आणि केंद्रीय गृहमंत्री अमित शाह यांच्या नेतृत्वावर विश्वास व्यक्त करत, आता आपण देशाच्या प्रगतीसाठी काम करणार असल्याचे चड्ढा यांनी स्पष्ट केले. “आम्ही आमचा राजकीय प्रवास भाजपसोबत पुढे नेत देशहितासाठी काम करू,” असेही त्यांनी सांगितले.
आम आदमी पक्षाची प्रतिक्रिया या घटनेनंतर आम आदमी पक्षाच्या गोटातून तीव्र प्रतिक्रिया उमटत आहेत. पक्षाचे नेते संजय सिंह यांनी याला ‘ऑपरेशन लोटस’चा भाग असल्याचे म्हटले असून, भाजप सत्तेचा गैरवापर करून विरोधकांना फोडत असल्याचा आरोप केला आहे.
या मोठ्या राजकीय घडामोडीनंतर आता दिल्ली आणि पंजाबच्या राजकारणात नवीन समीकरणे कशी जुळतात, याकडे सर्वांचे लक्ष लागले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
16:45 24-04-2026
