बिगर आदिवासींसाठी १८.५० लाख, तर नक्षलग्रस्त भागातील अंगणवाड्यांसाठी २४.०५ लाखांचा निधी मंजूर
रत्नागिरी: Ratnagiri Anganwadi Fund आणि राज्यातील बालविकास प्रकल्पांना बळ देणारा एक अत्यंत महत्त्वाचा निर्णय राज्य शासनाने घेतला आहे. राज्यातील अंगणवाड्यांचे बांधकाम अत्याधुनिक आणि डिजिटल करण्यासाठी शासनाने अंगणवाडी बांधकामाच्या निधीत घवघवीत वाढ केली आहे. या नवीन निर्णयामुळे आता बिगर आदिवासी भागातील अंगणवाड्यांसाठी १८ लाख ५० हजार रुपये, आदिवासी व डोंगराळ भागासाठी २० लाख ३५ हजार रुपये आणि नक्षलग्रस्त भागासाठी २४ लाख ५ हजार रुपयांचा निधी मिळणार आहे. या वाढीव निधीमुळे रत्नागिरी जिल्ह्यासह संपूर्ण महाराष्ट्रातील अंगणवाड्यांचा कायापालट होऊन त्या ‘स्मार्ट’ होणार आहेत.
जुने दर रद्द; ६०० चौरस फुटांचा नवीन अद्ययावत आराखडा लागू
दिल्या गेलेल्या माहितीनुसार, राज्य शासनाने यापूर्वी २०१० मध्ये मंजूर केलेला आराखडा आणि २०२२ मधील बांधकाम दर आता पूर्णपणे रद्द केले आहेत. मुख्य वास्तुशास्त्रज्ञ आणि सार्वजनिक बांधकाम विभाग यांनी संयुक्तपणे तयार केलेला ६०० चौरस फूट क्षेत्रफळाचा नवीन अद्ययावत आराखडा आता अंगणवाड्यांसाठी लागू करण्यात आला आहे. हा नवीन बांधकाम खर्च सर्व करांसह मंजूर करण्यात आला असून, हे नवे दर २०२६-२७ ते २०२८-२९ या तीन आर्थिक वर्षांच्या कालावधीसाठी लागू राहणार आहेत.
नवीन ‘स्मार्ट’ अंगणवाड्यांमधील ठळक सोयी-सुविधा
नवीन बालमैत्रीपूर्ण अंगणवाडी आराखड्यानुसार, अंगणवाड्यांच्या नव्या इमारतींमध्ये केवळ वर्गखोल्याच नसतील, तर चिमुकल्यांच्या गरजेनुसार अनेक आधुनिक सुविधांचा समावेश केला जाईल:
- अद्ययावत इमारत व शौचालय: आधुनिक इमारतीसोबतच बालकांसाठी स्वच्छ शौचालयाची व्यवस्था.
- दिव्यांगांसाठी रॅम्प: विशेष गरजा असणाऱ्या (दिव्यांग) मुलांसाठी सुलभ वावराकरिता रॅम्पची निर्मिती.
- विद्युतीकरण व पाणीपुरवठा: वीज जोडणी, शुद्ध पाणीपुरवठा आणि पाणी साठवणुकीची उत्तम व्यवस्था.
- आकर्षक रंगरंगोटी: बालमनाला आनंद देणारी आणि शैक्षणिक वातावरण निर्माण करणारी रंगरंगोटी.
मंजूर झालेल्या जुन्या अंगणवाड्यांना जुनेच दर लागू
शासनाने स्पष्ट केले आहे की, या नवीन निर्णयापूर्वी मंजूर झालेल्या अथवा सध्या अपूर्ण अवस्थेत असलेल्या अंगणवाडी बांधकामांना जुनेच दर लागू राहतील. नवीन कामे हाती घेताना स्थानिक भौगोलिक परिस्थिती, तापमान, मृदस्थिती (मातीचा प्रकार) आणि पर्जन्यमान या सर्व नैसर्गिक बाबींचा सखोल विचार करूनच बांधकाम करण्याच्या कडक सूचना प्रशासकीय अधिकाऱ्यांना देण्यात आल्या आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
13:45 05-06-2026
