रत्नागिरी जिल्हा प्रशासनाकडून दोन आठवड्यांची अंतिम मुदत
हद्दपारीची प्रलंबित प्रकरणे निकाली काढा, असे स्पष्ट आणि कडक निर्देश रत्नागिरीचे जिल्हाधिकारी मनुज जिंदल यांनी जिल्ह्यातील सर्व संबंधित उपविभागीय अधिकाऱ्यांना दिले आहेत. जिल्हाधिकारी कार्यालयात आयोजित नार्को को-ऑर्डिनेशन यंत्रणेच्या (NCORD) जिल्हास्तरीय समितीच्या महत्त्वपूर्ण बैठकीत ते बोलत होते. पुढील दोन आठवड्यांच्या आत ही सर्व प्रलंबित प्रकरणे पूर्णपणे निकाली काढून गुन्हेगारी आणि अंमली पदार्थ विरोधी मोहिमेला गती देण्याच्या सूचना त्यांनी यावेळी प्रशासनाला दिल्या.
चिपळूण परिसरासह पर्यटन स्थळांवर विशेष देखरेख
बैठकीत मार्गदर्शन करताना जिल्हाधिकारी मनुज जिंदल यांनी चिपळूण शहराचा प्रामुख्याने उल्लेख केला. चिपळूण हे जिल्ह्यातील मोठे आणि महत्त्वाचे शहर असून या परिसरात पर्यटकांची मोठी गर्दी असते, याकडे त्यांनी लक्ष वेधले. अशा संवेदनशील आणि गर्दीच्या ठिकाणी सर्वच प्रशासकीय अधिकाऱ्यांनी, विशेषतः पोलीस अधिकाऱ्यांनी अत्यंत सतर्क राहून अंमली पदार्थ विरोधात कडक कारवाई करावी, असे आदेश जिल्हाधिकाऱ्यांनी दिले आहेत.
जिल्हा शासकीय रुग्णालयात व्यसनमुक्ती केंद्र
अंमली पदार्थांच्या विळख्यातून नागरिकांना आणि तरुणांना बाहेर काढण्यासाठी केवळ कारवाई पुरेशी नसून उपचाराचीही गरज बैठकीत व्यक्त करण्यात आली. यासाठी रत्नागिरी येथील जिल्हा शासकीय रुग्णालयामध्ये स्वतंत्रपणे व्यसनमुक्ती केंद्र तातडीने सुरू करावे, अशी सूचना जिल्हाधिकाऱ्यांनी केली. अंमली पदार्थ विरोधातील या लढ्यात प्रत्येक शासकीय विभागाने आपापले योगदान देऊन सक्रिय कार्यवाही करावी, असे आवाहनही त्यांनी केले.
एमआयडीसीमधील रासायनिक कारखान्यांची होणार तपासणी
पोलीस अधीक्षक नितीन बगाटे यांनी या बैठकीत अंमली पदार्थांच्या निर्मितीवर थेट प्रहार करण्याचे संकेत दिले. ‘एमडी’ (मेफेड्रोन) हे अंमली पदार्थ बनवण्यासाठी जी रसायने लागतात, ती आपल्या जिल्ह्यातील एमआयडीसीमधील कारखान्यांमध्ये तयार होतात का? याबाबतची सखोल यादी तयार करण्याचे निर्देश त्यांनी दिले. तसेच जिल्ह्यात वाहतूक होणाऱ्या अशा रसायनांची संपूर्ण माहिती गोळा करावी आणि ज्या कारखान्यांमध्ये रसायनांचे उत्पादन होते, त्यांच्या नावांची यादी फॅक्टरी निरीक्षकांनी त्वरित घ्यावी, अशी सूचना पोलीस अधीक्षकांनी केली.
वरिष्ठ अधिकाऱ्यांची बैठकीला उपस्थिती
या उच्चस्तरीय बैठकीला जिल्ह्यातील विविध विभागांचे प्रमुख अधिकारी उपस्थित होते. यामध्ये अप्पर पोलीस अधीक्षक बी. बी. महामुनी, जिल्हा आरोग्य अधिकारी डॉ. अनिरुद्ध आठल्ये, उत्पादन शुल्क अधीक्षक कीर्ती शेडगे, जिल्हा अधीक्षक कृषी अधिकारी शिवकुमार सदाफुले आणि पोलीस निरीक्षक नितीन ढेरे आदींचा समावेश होता. सर्वच विभागांनी आपली जबाबदारी ओळखून या मोहिमेत सक्रिय सहभाग घेण्याचा निर्धार बैठकीत व्यक्त केला.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
15:09 11-06-2026
