रत्नागिरी: ‘Gogate Joglekar College Kalidas Din’ (गोगटे-जोगळेकर महाविद्यालय कालिदास दिन) या उपक्रमांतर्गत रत्नागिरीतील नामांकित गोगटे-जोगळेकर महाविद्यालयाच्या संस्कृत विभागातर्फे महाकवी कालिदास दिन अत्यंत उत्साहात साजरा करण्यात आला. हा सोहळा महाविद्यालयाच्या डॉ. ज. शं. केळकर सेमिनार हॉलमध्ये पार पडला. कालिदास दिनाचे औचित्य साधून संस्कृत साहित्यातील विविध पैलूंवर प्रकाश टाकण्यात आला.
महाविद्यालयाच्या परंपरेनुसार, दरवर्षी कालिदास दिनानिमित्त संस्कृत विभागातील पदव्युत्तर पदवी प्राप्त (Postgraduate) विद्यार्थ्यांना व्याख्यानासाठी हक्काचे व्यासपीठ उपलब्ध करून दिले जाते. याच परंपरेचे जतन करत यावर्षी संस्कृत विषयातून एमए पदवीप्राप्त विद्यार्थी ओंकार खांडेकर तसेच इतिहास विभागातून पदवी मिळवून सध्या त्याच विभागात ऑनर्सचे शिक्षण घेत असलेला विद्यार्थी ओंकार आठवले या दोघांची अभ्यासपूर्ण व्याख्याने आयोजित करण्यात आली होती.
या व्याख्यान सत्रात ओंकार खांडेकर याने महाकवी कालिदास विरचित ‘विक्रमोर्वशीयम् : एक रसास्वाद’ या विषयावर आपले विचार मांडले. त्याने या प्रसिद्ध नाटकातील रसात्मकता, मूळ कथानकाची गुंफण, आशयवैशिष्ट्ये आणि विविध साहित्यिक पैलूंवर अत्यंत सुंदर व अभ्यासपूर्ण विवेचन केले. तर दुसरीकडे, ओंकार आठवले याने ‘कालिदास : काळ व कार्य’ या विषयावर माहितीपूर्ण सादरीकरण केले. कविकुलगुरू महाकवी कालिदास यांचे जागतिक साहित्यातील योगदान, त्यांच्या कालखंडाविषयी विद्वानांमधील विविध मतप्रवाह आणि संस्कृत साहित्यातील त्यांचे अढळ स्थान याचा सविस्तर परामर्श त्याने आपल्या व्याख्यानात घेतला.
या क्रीडा व शैक्षणिक वर्षापासून महाविद्यालयात एक नवा स्तुत्य उपक्रम सुरू करण्यात आला आहे. बाळकृष्ण रघुनाथ बापट स्मृती प्रित्यर्थ अमेरिकास्थित डॉ. ओंकार जोशी यांनी दिलेल्या विशेष देणगीतून संस्कृत विभागातील प्रथम, द्वितीय आणि तृतीय वर्षातील पात्र व गुणवंत विद्यार्थ्यांना शिष्यवृत्ती देण्यास सुरुवात झाली आहे. या योजनेचा पहिला मान यावर्षी प्रथम वर्षातील कीर्ती प्रवीण पुजारे, द्वितीय वर्षातील पूर्वश्री विनोद जावडेकर आणि तृतीय वर्षातील स्मितल मधुसूदन बेंडे या विद्यार्थिनींना मिळाला. महाविद्यालयाचे प्राचार्य डॉ. मकरंद साखळकर यांच्या हस्ते या विद्यार्थिनींना शिष्यवृत्ती प्रदान करून गौरविण्यात आले.
या प्रसंगी प्राचार्य प्रा. डॉ. मकरंद साखळकर यांनी उपस्थित राहून कार्यक्रमाला आणि विद्यार्थ्यांना पुढील वाटचालीसाठी शुभेच्छा दिल्या. कला शाखा उपप्राचार्य तथा संस्कृत विभागप्रमुख प्रा. डॉ. कल्पना आठल्ये यांनी या नवीन शिष्यवृत्ती योजनेची सविस्तर पार्श्वभूमी सांगत व्याख्यात्यांचे व शिष्यवृत्तीप्राप्त विद्यार्थिनींचे विशेष अभिनंदन केले. कार्यक्रमाची सुरुवात तृतीय वर्षातील विद्यार्थिनी तेजस्विनी जोशी, पूर्वा खाडिलकर आणि दीप्ती गद्रे यांच्या सुमधुर श्लोकगायनाने झाली. कार्यक्रमाचे प्रास्ताविक प्रा. प्रज्ञा भट यांनी केले, सूत्रसंचालन शिष्यवृत्तीविजेती विद्यार्थिनी स्मितल बेंडे हिने केले, तर शेवटी मधुश्री वझे हिने उपस्थितांचे आभार मानले.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:33 16-07-2026
