निष्काळजीपणा ठरला जीवघेणा; चौघांचा मृत्यू तर एक जण गंभीर जखमी
लांजा: लांजा अपघात गुन्ह्याप्रकरणी मुंबई-गोवा महामार्गावर लांजा येथील अद्वैत पेट्रोल पंपाजवळ झालेल्या भीषण अपघाताला कारणीभूत ठरल्याबद्दल कारचालक आणि रस्त्यावर डंपर उभा करणाऱ्या चालकाविरुद्ध लांजा पोलीस ठाण्यात गुन्हा दाखल करण्यात आला आहे. या भीषण अपघातात चौघांचा दुर्दैवी मृत्यू झाला असून एक जण गंभीर जखमी झाला आहे. या प्रकरणी पोलीस उपनिरीक्षक अमोद लक्ष्मण सरंगळे यांनी दिलेल्या फिर्यादीनुसार, कारचालक मुस्तफा अल्ताफभाई काफी (वय २०, रा. जामनगर, गुजरात) आणि डंपरचालक महेश कुमार नुनूचंद महतो (वय २६, मूळ रा. गिरिडीह, झारखंड, सध्या रा. पाली, रत्नागिरी) यांच्याविरुद्ध भारतीय न्याय संहिता (BNS) तसेच मोटार वाहन कायद्यान्वये गुन्हा दाखल करण्यात आला आहे.
गोव्याहून मुंबईकडे जाणाऱ्या कारची डंपरला जोरदार धडक
पोलिसांनी दिलेल्या अधिकृत माहितीनुसार, १५ जुलै रोजी सकाळी ६.३० च्या सुमारास कारचालक मुस्तफा काफी हा आपल्या ताब्यातील हुंडाई ग्रँड आय-१० कार (क्रमांक एमएच-०१-सीपी-८०२१) घेऊन गोव्याहून मुंबईच्या दिशेने चालला होता. या कारमधून यास्मीन इरफान कुरेशी (वय ५४), फिजा अनस कुरेशी (वय २७), महम्मद इरफान इस्लाम कुरेशी (वय १५) आणि महम्मद अनस इरफान कुरेशी हे प्रवास करत होते. महामार्गावरील अद्वैत पेट्रोल पंपाजवळ कार आली असता, चालकाने भरधाव व निष्काळजीपणाने वाहन चालवत रस्त्यावर उभ्या असलेल्या आयशर डंपरला (क्रमांक एमएच-०५-एल-३८७७) पाठीमागून जोरदार धडक दिली.
अपघातात चौघांचा मृत्यू; डंपरचालकाचा धोकादायक हलगर्जीपणा उघड
या भीषण अपघातात कारमधील यास्मीन कुरेशी, फिजा कुरेशी, महम्मद इरफान कुरेशी तसेच कारचालक मुस्तफा काफी या चौघांचा जागीच मृत्यू झाला, तर महम्मद अनस कुरेशी हे गंभीर जखमी झाले आहेत. पोलिसांच्या प्राथमिक तपासात असे निष्पन्न झाले आहे की, डंपरचालक महेश महतो याने महामार्गावर आपला डंपर अत्यंत धोकादायक पद्धतीने उभा केला होता. डंपर उभा करताना त्याने मागे कोणतीही टेल लाईट, रिफ्लेक्टर, इशारा फलक किंवा सुरक्षेची इतर व्यवस्था केली नव्हती. त्यामुळे हा डंपरचालकही अपघातास तितकाच कारणीभूत ठरल्याचे पोलिसांनी नमूद केले आहे.
भारतीय न्याय संहितेनुसार कडक कलमे लागू
तपासाची सद्यस्थिती: लांजा पोलिसांनी या प्रकरणी कठोर कायदेशीर पावले उचलली आहेत. दोन्ही चालकांविरुद्ध भारतीय न्याय संहिता २०२३ मधील कलम १०६(१), २८१, २८५, १२५(अ), १२५(ब) तसेच मोटार वाहन कायद्यातील संबंधित कलमान्वये गुन्हा दाखल करण्यात आला आहे. लांजा पोलीस ठाण्याचे अधिकारी या संपूर्ण अपघाताचा पुढील तपास करत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:50 18-07-2026
