शेलार इस्टेट सोसायटीने भावेश चव्हाणचा सत्कार करत व्यक्त केला अभिमान
भावेश चव्हाणचा सत्कार शेलार इस्टेट सहकारी गृहनिर्माण सोसायटीच्या वतीने आयोजित एका विशेष समारंभात करण्यात आला. नीट-यूजी २०२६ (NEET-UG 2026) परीक्षेत एसटी (ST) प्रवर्गात महाराष्ट्रात प्रथम तर संपूर्ण देशात चौथा क्रमांक पटकावणाऱ्या रत्नागिरीच्या या गुणी सुपुत्राने मिळवलेल्या अभूतपूर्व यशाचा गौरव करण्यासाठी या कार्यक्रमाचे आयोजन करण्यात आले होते. राष्ट्रीय स्तरावर मिळालेल्या या उज्ज्वल यशामुळे रत्नागिरीच्या शिरपेचात मानाचा तुरा रोवला गेला असून, सोसायटीतर्फे भावेशला शाल, पुष्पगुच्छ आणि स्मृतिचिन्ह देऊन सन्मानित करण्यात आले.
७२० पैकी ६६६ गुण मिळवून केली उत्तुंग कामगिरी
भावेश सुरेश चव्हाण याने अत्यंत कठीण मानल्या जाणाऱ्या नीट परीक्षेत ७२० पैकी तब्बल ६६६ गुण मिळवून हे दैदिप्यमान यश संपादन केले आहे. त्याच्या या कामगिरीमुळे वैद्यकीय क्षेत्रात उच्च शिक्षणाची दारे खुली झाली आहेत. या सत्कार सोहळ्यात उपस्थितांनी भावेशच्या परिश्रम, जिद्द आणि चिकाटीचे मनापासून कौतुक केले. तसेच त्याच्या या यशामुळे संपूर्ण रत्नागिरी जिल्ह्यासाठी अत्यंत अभिमानास्पद क्षण निर्माण झाल्याची भावना कार्यक्रमादरम्यान व्यक्त करण्यात आली.
राजकीय व सामाजिक क्षेत्रातील मान्यवरांची उपस्थिती
या सोहळ्याला विविध क्षेत्रातील प्रमुख मान्यवरांनी उपस्थित राहून भावेशला पुढील वैद्यकीय शिक्षणासाठी शुभेच्छा दिल्या. कार्यक्रमाला भारतीय जनता पार्टी महिला मोर्चा रत्नागिरी दक्षिण जिल्हाध्यक्षा सौ. वर्षा परशुराम ढेकणे, भाजपा रत्नागिरी शहराध्यक्ष परशुराम उर्फ दादा ढेकणे, शहर सरचिटणीस निलेश आखाडे, महिला शहराध्यक्षा भक्ती दळी, राजन फाळके, नितीन गांगण, शैलू बेर्डे, सौ. आखाडे, प्रज्ञा टाकळे, सचिन गांधी, अजिंक्य केसरकर, आणि सोनाली केसरकर हे विशेषत्वाने उपस्थित होते.
सोसायटीचे पदाधिकारी आणि नागरिक मोठ्या संख्येने उपस्थित
या गौरव सोहळ्यात उत्सवमूर्ती भावेश सुरेश चव्हाण याचे आई-वडील देखील उपस्थित होते. शेलार इस्टेट सहकारी गृहनिर्माण सोसायटीच्या वतीने आयोजित या कार्यक्रमात सर्व मान्यवरांचा योग्य सन्मान राखण्यात आला. याप्रसंगी सोसायटीचे सर्व पदाधिकारी आणि सदस्य मोठ्या संख्येने उपस्थित राहून भावेशच्या यशाच्या आनंदात सहभागी झाले. उपस्थितांनी भावेशला त्याच्या भावी डॉक्टर होण्याच्या प्रवासासाठी उदंड शुभेच्छा दिल्या.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:27 20-07-2026
