मुसळधार पावसामुळे जगबुडी नदी ५.७० मीटरवर; मटण-मच्छी मार्केट परिसरात पाणी शिरल्याने मोठे नुकसान, खेड प्रशासनाकडून सतर्कतेचा इशारा
खेड जगबुडी नदी इशारा पातळीपार करत वाहू लागल्याने रत्नागिरी जिल्ह्यातील खेड शहरावर पुन्हा एकदा पुराचे गंभीर संकट ओढावले आहे. गेल्या काही दिवसांपासून सुरू असलेल्या संततधार मुसळधार पावसामुळे जगबुडी नदीने आपली इशारा पातळी ओलांडली असून, नदीचे पाणी खेड शहराच्या सखल भागांमध्ये शिरण्यास सुरुवात झाली आहे. विशेष म्हणजे गेल्या अवघ्या १५ दिवसांतील ही तिसरी वेळ असल्याने खेडमधील व्यापारी, व्यावसायिक आणि सर्वसामान्य नागरिकांमध्ये चिंतेचे वातावरण निर्माण झाले आहे.
जगबुडी नदीची इशारा पातळी ५ मीटर इतकी निश्चित करण्यात आलेली असून, धोक्याची पातळी ७ मीटर आहे. सध्या नदीची पाणीपातळी ५.७० मीटरवर पोहोचली असून ती इशारा पातळीच्या वरून वाहत आहे. पावसाचा जोर असाच कायम राहिल्यास आणि खंड न पडल्यास नदीची पातळी धोक्याची खूण गाठण्याची दाट शक्यता निर्माण झाली आहे.
नदीला आलेल्या पुरामुळे खेड शहराच्या दैनंदिन जनजीवनावर विपरीत परिणाम झाला आहे. पुराचे पाणी शहरात वेगाने शिरल्याने मुख्यत्वे मटण आणि मच्छी मार्केट परिसरातील अनेक दुकानांमध्ये पाणी साचले आहे. यामुळे व्यापाऱ्यांचे मोठे आर्थिक नुकसान होत असून, वारंवार येणाऱ्या पुरामुळे स्थानिक नागरिक हवालदिल झाले आहेत. पंधरा दिवसांत तिसऱ्यांदा आलेल्या पुरामुळे सर्व व्यवहार पूर्णपणे विस्कळीत झाले आहेत.
स्थानिक प्रशासनाकडून सतर्कतेचा इशारा आणि तयारी
परिस्थितीचे गांभीर्य ओळखून स्थानिक प्रशासनाकडून नदीच्या पाणीपातळीवर आणि पूरपरिस्थितीवर बारकाईने लक्ष ठेवले जात आहे. जगबुडी नदीकाठच्या नागरिकांना आणि व्यापाऱ्यांना योग्य ती खबरदारी घेण्याच्या आणि सुरक्षित राहण्याच्या स्पष्ट सूचना देण्यात आल्या आहेत.
पावसाचा जोर कायम राहिल्यास आपत्कालीन परिस्थिती टाळण्यासाठी नदीकाठच्या सखल भागातील नागरिकांचे सुरक्षित स्थळी स्थलांतर करण्याची पूर्वतयारी प्रशासनाकडून केली जात आहे. स्थानिक आपत्कालीन यंत्रणा सज्ज ठेवण्यात आल्या असून, नागरिकांनी घाबरून न जाता सतर्क राहावे आणि आवश्यकतेनुसार सुरक्षित स्थळी आश्रय घ्यावा, असे आवाहन प्रशासनातर्फे करण्यात आले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:25 20-07-2026
