रत्नागिरी: ‘रत्नागिरी जिल्हा परिषद आरोग्य धडक मोर्चा’ येत्या बुधवार, २२ जुलै २०२६ रोजी जिल्हा परिषद मुख्यालयावर धडकणार आहे. जिल्ह्यात एका बाजूला विकासाच्या नावाखाली कोट्यवधी रुपयांचा निधी खर्च होत असल्याचा दावा केला जात असताना, दुसऱ्या बाजूला मात्र सर्वसामान्य नागरिकांच्या मूलभूत आरोग्य सुविधांकडे पूर्णपणे दुर्लक्ष होत असल्याचा आरोप करत या आंदोलनाची हाक देण्यात आली आहे. जिल्हा परिषद प्रशासनाच्या निष्काळजी कारभाराविरोधात आणि नागरिकांच्या आरोग्याचा प्रश्न ऐरणीवर आणण्यासाठी हा मोर्चा आयोजित करण्यात आला आहे.
धोकादायक इमारती अन् डॉक्टरांची टंचाई; आरोग्य यंत्रणा व्हेंटिलेटरवर
रत्नागिरी जिल्ह्यातील आरोग्य यंत्रणा सध्या अत्यंत दयनीय अवस्थेत असून ती एकप्रकारे व्हेंटिलेटरवर ढकलली गेल्याचे चित्र आहे. जिल्ह्यातील अनेक प्राथमिक आरोग्य केंद्रांच्या इमारती धोकादायक स्थितीत पोहचल्या आहेत. याशिवाय, डॉक्टरांची तीव्र टंचाई आणि आरोग्य कर्मचाऱ्यांची शेकडो पदे रिक्त असल्याने ग्रामीण भागातील रुग्णांचे नाहक हाल होत आहेत. मूलभूत सोयी-सुविधांचा अभाव असल्याने उपचारासाठी आलेल्या नागरिकांना वैद्यकीय सेवा मिळवणे कठीण झाले आहे.
रत्नागिरी जिल्हा परिषद आरोग्य धडक मोर्चा: “विकास नेमका कोणासाठी?” संयोजकांचा सवाल
“कोट्यवधी रुपयांचा निधी खर्च होऊनही जर रुग्णांना वेळेवर उपचार आणि साध्या सुविधा मिळत नसतील, तर हा विकास नेमका कोणासाठी?” असा थेट सवाल या आंदोलनाचे संयोजक प्रथमेश गावणकर यांनी उपस्थित केला आहे. “आरोग्य हा आमचा मूलभूत अधिकार आहे” या भावनेतून प्रशासनाला जाब विचारण्यासाठी आणि निद्रिस्त प्रशासनाला जागे करण्यासाठी हा लढा उभारण्यात आल्याचे त्यांनी स्पष्ट केले.
नागरिकांना मोठ्या संख्येने उपस्थित राहण्याचे आवाहन
नागरिकांच्या हक्काच्या आरोग्य सुविधा त्यांना मिळवून देण्यासाठी हे आंदोलन पुकारण्यात आले आहे. रत्नागिरी तालुक्यातील सर्व सुज्ञ, जागरूक आणि आपल्या हक्कासाठी लढणाऱ्या नागरिकांनी बुधवारच्या या धडक मोर्चाला मोठ्या संख्येने उपस्थित राहून आपले योगदान द्यावे, असे आवाहन संयोजक प्रथमेश गावणकर यांनी केले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:15 22-07-2026
